जनकपुरधाम । मधेस प्रदेश सरकारले प्रदेश नीति तथा योजना आयोगको सदस्यमा डा. सोहन साह नियुक्त भएका छन् । प्रदेश सरकारको गत असोज १६ गते बसेको मन्त्रिपरिषद् बैठकले उनलाई सदस्यमा नियुक्त गर्ने निर्णय गरेको हो ।
मधेस प्रदेश नीति आयोगको गठन तथा कार्य सञ्चालनको सम्बन्धमा व्यवस्था गर्न बनेको ऐन, २०७५ को दफा ३ को उपदफा (२) को खण्ड (ग) बमोजिम आयोगको सदस्यमा नियुक्त गरिएको मुख्यमन्त्री तथा मन्त्रिपरिषद् कार्यालयका प्रमुख सचिव दिनेशकुमार घिमिरेले जानकारी दिएका छन् ।
करिब एक दशक बढी समयदेखि अध्ययन अनुसन्धानको क्षेत्रमा काम गर्दै आएका डा.साह जवाहर लाल नेहरु विश्वविद्यालयबाट पिएचडी गरेका हुन् । उनी हाल मार्टिन चौतारीमा आवद्ध भएर अध्ययन अनुसन्धानको काम गर्दै आएका थिए ।
मधेस प्रदेश सरकारले पहिलो पटक सार्वजनिक गरेको मधेस प्रदेश सरकारको आर्थिक सर्वेक्षण उनकै सहयोगमा अर्थ मन्त्रालयले तयार पारेको थियो । यसका साथ साथै डा. साह मधेसको शिक्षा सुधार अभियन्ताको रुपमा समेत चिनिन्छन् ।
प्राविधिक धारको उच्च शिक्षा प्रदान गर्ने जनकपुर कम्युनिटी कलेको संस्थापक प्रिन्सिपल समेत उनी हुन् । केहीअघि मात्रै उनले सम्पादन गरेको मधेश प्रदेशमा पैदल अनुसन्धान नामक पुस्तक सार्वजनिक भएको छ । जुन पुस्तकमा मधेशको वास्तविकता झल्काईएको छ ।
अध्ययन अनुसन्धानको क्षेत्रमा राष्ट्रिय तथा अन्तर्राष्ट्रिय स्तरमा ख्याति कमाएका योजना आयोगको सदस्यमा नियुक्त डा. साहले प्रदेशको विकासबारे योजना बनाउन तथा प्रदेश सरकारको आर्थिक सल्लाहकारको रुपमा काम गर्नेछ ।
बौद्धिक र इमान्दार छवि बनाएका डा. साहले प्रदेशको शैक्षिक सुधार आफ्नो प्राथमिकताको विषय भएको बताएका छन् । देशको सबैभन्दा विकट मानिने कर्णाली प्रदेश भन्दा पनि कम साक्षरता दर रहेको मधेस प्रदेश सरकारलाई मुख्य चुनौतीको रुपमा रहेको साक्षरता अभियानलाई योजनाबद्ध ढंगले सघाउने बताए । साक्षता दर बढाउन नीति अनुसन्धानको मुख्य भूमिका रहने भएको हुँदा यसलाई मुख्य प्राथमिकता राखी अगाडी बढ्ने डा. साहले बताए ।
यस्तै विशेष गरी प्रदेश सरकारको आर्थिक अनुसन्धानको पोर्टफोलियोलाई अगाडी बढाउनेमा प्रतिबद्ध रहने बताए । सूचना तथ्यांकको आधारमा नीति बढाउने कुरामा समेत जोड दिने उनको योजना छ ।
प्रदेशका मुख्यमन्त्री अध्यक्ष रहने गरी बढीमा ८ सदस्य आयोगका सदस्यमा मध्ये उनी तेश्रो सदस्यको रुपमा नियुक्त भएका हुन् । यसअघि आयोगको उपाध्यक्षमा नथुराम चौधरी, डा.हरिशंकर प्रसाद साह र शिला मिश्रलाई मुख्यमन्त्री सरोजकुमार यादवले नियुक्त गरिसकेका छन् ।
