काठमाडौं । जनमत पार्टीका अध्यक्ष डा.सीके राउतले संसदमा सांसदहरुले बोलेका कुराको कुनै औचित्य नरहने गरेको गुनासो गरेका छन् ।
आज काठमाडौंमा आयोजित चाडपर्वका अवसरमा शुभकामना आदानप्रदान कार्यक्रममा अध्यक्ष डा. राउतले संसदीय व्यवस्था भनिए पनि सांसदहरुको आवाज नै नसुनिएको बताए । ठूला नेताले भने जे बोले पनि त्यही हुने गरेको उनको भनाइ छ ।
‘भन्नलाई संसदीय व्यवस्था भन्छौँ । तर त्यहाँ सांसदले भनेको कुरा लागु हुँदैन’, उनले भने, ‘दुई/तीन जना नेताले जे निर्णय गर्छन् त्यही कुरा लागु हुने व्यवस्था छ ।’
अध्यक्ष डा.राउतले जनमत पार्टी पहिलो प्रयासमै राष्ट्रिय दल बनेको उल्लेख गर्दै अर्को निर्वाचनमा देशको नेतृत्व गर्ने गरी तयारी गर्नु पर्ने बताए ।
