जनकपुरधाम । नेपाली कांग्रेस धनुषा क्षेत्र नम्वर २ को सभापति र महासमिति सदस्यका लागि आज मतदान हुँदैछ ।
बिदेह नगरपालिकाका ६ तीनकौरियास्थित जनता नमुना प्राविधिक माध्यमिक विद्यालयमा विहान १० बजेबाट मतदान सुरु भएको हो । दिउँसो ४ बजेसम्म मतदान जारी रहने कांग्रेस क्षेत्रीय निर्वाचन समितिले जनाएको छ ।
क्षेत्रीय सभापतिका लागि साधु भनेर चिनिने शिवशंकर कुमार गोइत, नवीन कुमार गोहिवार र भूपनारायण यादव उम्मेदवार छन् । साधु संस्थापन पक्षका छन् । नवीन र भूपनारायण दुबैजना शेखर कोइराला समूहकै छन् ।
साधुलाई पार्टीका सहमहामन्त्री महेन्द्र यादव, केन्द्रीय सदस्य मुक्ता यादव र पुराना नेता आनन्द ढुंगानाको समर्थन छ । सोही क्षेत्रमा पर्ने हंसपुर नगरपालिकाका मेयर प्रदिप यादव र कमला नगरपालिकाका मेयर विशेश्वर यादव पनि साधुकै पक्षमा उभेका छन् ।
नविनलाई पूर्व सांसद दिनेश प्रसैला मैदानमा उतारेको स्रोतको दावी छ । क्षेत्र नम्वर २ बाटै निर्वाचित प्रतिनिधिसभा सदस्य रामकृष्ण यादव भूपनारायणलाई जिताउन माहोल बनाइरहेका छन् । पूर्व सांसद शिवधारी यादव पनि भूपनारायणकै पक्षमा छन् ।
