जनकपुरधाम ।महोत्तरीको गौशाला नगरपालिकाकी उपप्रमुख रेनुकुमारी महतोले प्रयोग गर्ने सवारीमा मध्यराति आगजनी गरिएको छ । गौशाला नगरपालिका–१ रामनगर स्थित उपप्रमुखको निवास अगाडि राखिएको गाडीमा पेट्रोल छर्केर आगजनी गरिएको इलाका प्रहरी कार्यालय गौशालाका प्रहरी निरीक्षक मनोज यादवले बताए ।
उपप्रमुख महतोले प्रयोग गर्ने प्रदेश २–०२–००१झ ०००५ नम्बरको गाडीमा आगजनि गरिएको प्रहरी निरीक्षक यादवले बताए । गाडीको टायर बलेर गन्हाएपछि गाडीमा आगो लागेको छिमेकीले थाहा पाएका थिए । आगो लागेको केहि बेरमै छिमेकीले देखेका कारण गाडीको पछाडिको टायर र केही बाहिरी भागमा मात्र क्षति भएको प्रहरी निरीक्षक यादवले बताए । स्थानीयले नै आगो निभाएका थिए ।
यता उपप्रमुख महतोले गौशाला नगरपालिकाका कर्मचारी र जनप्रतिनिबाटै आफू असुरक्षित भएको बताएकी छिन् । कार्यकक्षमै आक्रमण, कार्यपालिका बैठकमा जनप्रतिनिधिबाटै हातपातको प्रयास हुनु, गाडीको चालकलाई बिना जानकारी हटाउनु र गाडीमा आगो लगाउने घटनाले आफू असुरक्षित भएको महतोले बताइन् । गौशाला नगरपालिकामा जनता समाजवादी पार्टी नेपालबाट नगरप्रमुख डा. दीपेन्द्र महतो र उपप्रमुखमा रेनुकुमारी महतो बिच द्वन्द्वका कारण प्रमुखका आफन्तले केही समय अघि कार्यकक्षमै गएर हातपात गर्न खोजेका थिए । उपप्रमुख महतोलाई कार्यकक्षमै भौतिक आक्रमण गर्दा गाडी चालकले बचाएका थिए । कार्यकक्षमा उपप्रमुखलाई आक्रमणबाट बचाएको भन्दै नगरप्रमुखले वडा अध्यक्षहरुलाई बोलाएर उपप्रमुखको गाडी चालक नारेन्द्र महतोलाई साउन २८ गते हटाउने निर्णय गरी गाडी खोस्ने प्रयास गर्दा दुई पक्ष बिच नगरपालिकामा झडप समेत भएको थियो ।
एउटै पार्टीबाट निर्वाचित प्रमुख र उपप्रमुख बीचको द्वन्द्वका कारण कार्यलयको बैठक वा सार्वजनिक कार्यक्रमहरुमासँगै बस्दा समेत बोलचाल हुँदैन । निर्वाचनमा सँगै हात छोडेर मत मागेका नगरप्रमुख र उपप्रमुख निर्वाचित भएदेखि सुरु भएको मनमुटाव सुरु भएको हो ।
गौशाला नगरपालिका–२ मा निर्माणधिन धर्माशाला निर्माण रोक्का सम्बन्धी जिल्ला प्रशासन कार्यालय महोतरीको पत्र पाएर अनुगमन गरेको र वडा अध्यक्षलाई छलफलका लागि बोलाएकी उपप्रमुखलाई नगरप्रमुखको भाइ नातामा पर्ने आफन्तले अनुमति बिना गाउँमा जान नमिल्ने भन्दै आक्रमण गरेका थिए ।
आक्रमणमा संलग्नहरु विरुद्ध जिल्ला प्रशासनमा मुद्दा दर्ता छ । आफन्तमाथि मुद्दा लागेपछि नगरप्रमुखले उपप्रमुखमाथि मुद्दा दर्ता गराउन कर्मचारीलाई नै प्रयोग गर्न खाजेको एक अधिकृतले बताए । योजनाको फाइलका विषयमा कर्मचारीलाई कुटपिट गरेको भन्दै प्रमुखकै योजनामा कर्मचारीले आन्दोलन समेत गरे । उपप्रमुख महतोले नदी उत्खनन् अनुगमन, नदी उत्खनन् ठेक्का, बजार ठेक्का, भवन निर्माण अनुगमनमा कडाइ गर्दा नगरप्रमुखसँग द्वन्द्व बढेको हो ।
गौशाला नगरपालिका–१ मा इन्जियरिङ भवन निर्माणमा अख्तियारले कर्मचारी र जनप्रतिनिधिसँग जवाफ मागेको छ । योजनामा पटकपटक भुक्तानी भएको र अध्ययनका लागि फाइल माग्दा फाँटका कर्मचारी र प्रमुख प्रशासकिय अधिकृतले फाइल दिन आलटाल गरेको उपप्रमुख महतोले बताइन् ।
‘योजना अनुगमनको जिम्मेवारी पाएकी उपप्रमुखलाई कर्मचारीले कुनै फाइल नै दिँदैन,’ उपप्रमुख महतोले भने, ‘फाँटमा जाँदा कर्मचारी ताल्चा लगाएर बाहिर जान्छ । प्रशासकिय अधिकृत शम्भु ठाकुर त फोन समेत उठाउँदैन ।’
