जनकपुरधाम । महोत्तरीको मटिहानी गान्धीगल्ली सीमा ईलाकामा सशस्त्र प्रहरीको टोलीले प्रतिबन्धित लागूऔषधसहित एक जनालाई पक्राउ गरेको छ ।
पक्राउ पर्नेमा महोत्तरीको मटिहानी २, बरदाहाका ५२ वर्षीय अनवर शेख छन् । उनलाई ईलाकामा बोर्डर आउट पोष्ट मटिहानीका सशस्त्र प्रहरी नायव निरीक्षक प्रेम बहादुर भुजेलको कमाण्डको टोलीले पक्राउ गरेको हो ।
शेखको साथबाट लागूऔषध डाईजापाम ईन्जेक्सन ५५६ वटा, प्रोमेन्थाजाईन ईन्जेक्सन ६४० वटा र ब्रुफ्रेनरफिन ईन्जेक्सन ४९८ वटा बरामद भएको सशस्त्र प्रहरी बल नेपाल नम्बर ९ गण हेड क्वार्टर महोत्तरीले जनाएको छ ।
शेखले भारतबाट उक्त प्रतिबन्धित ईन्जेक्सनहरु निलो झोलामा बोकी ल्याएका थिए । सशस्त्र प्रहरीको टोलीलाई देख्नेबित्तिकै भाग्न खोजेपछि नियन्त्रणमा लिएर चेकजाँच गर्दा प्रतिवन्धित लागुऔषध बरामद भएको सशस्त्र प्रहरीले जनाएको छ ।
शेखलाई सशस्त्र प्रहरीले आवश्यक अनुसन्धान तथा कारवाहीका लागि जिल्ला प्रहरी कार्यालय महोत्तरी, जलेश्वरमा बुझाएको छ ।
