०२ साउन २०८१, बिहिबार
18-07-2024 , Thu
×

मधेस प्रदेश: चोरी रोक्न सामुदायिक गस्ती

Logo
न्यूजमधेश प्रकाशित बिहिबार, माघ ०४, २०८०

महोत्तरी । महोत्तरीको मनरासिस्वा नगरपालिका–८ का बासिन्दाहरू चोरी र डकैती रोक्न अत्यधिक चिसोमा पनि रातभर जाग्राम बस्न बाध्य छन् ।वडा नं. ८ सहसरामका पूर्ववडाध्यक्ष राधेश्याम तिवारीले चोरी, डकैतीका घटनाहरू बढ्न थालेपछि स्थानीयहरू रातभर जाग्राम बस्न बाध्य रहेको बताउनुभयो ।

उहाँले चिसो मौसममा शीत तपतप चुहिरहेको भए पनि आफूहरू हातमा लट्ठी लिएर रातभरि घुम्दै फिर्दै ‘जगले रहब’ जागै बसौँ भन्दै टोल टोल घुम्न बाध्य रहेको बताउनुभयो । उहाँले यो कार्यमा कट्टीकटैया प्रहरी चौकीका प्रहरीले समेत साथ दिइरहेको बताउँदै उहाँले दुई हप्तादेखि निरन्तर रूपमा जाग्राम बस्न थालेपछि वडामा चोरी डकैतीको घटना रोकिएको बताउनुभयो ।

दुई हप्ताअगाडि मात्रै रामचन्द्र तिवारीसहित तीन घरबाट डाँका समूहले लाखौँको लुटपाट गरेको तथा केही घरमा चोरीसमेत हुन थालेपछि चोरी रोक्न जाग्राम बस्नुपरेको पूर्ववडाध्यक्ष तिवारीले बताउनुभयो । उहाँले भन्नुभयो, “वडाको सुरक्षार्थ हरेक टोलका युवा आआफ्नो समूह बनाएर प्रहरीको समेत संलग्नतामा रातभरि गस्ती गर्ने गरेका छौँ, त्यसैले अहिले वडामा चोरी डकैतीका घटना रोकिएको छ ।’’ गस्तीका कारण सो वडामा चोरी डकैती रोकिएपछि अन्य वडामा चोरीका घटना बढ्न थालेका छन् । हालै मात्र वडा नं. ७ झिङ्गाथान पछबारी टोलबाट लाखौँको धनमाल लुटपाट भएको छ ।

पुस २६ गते मध्यरात घरेलु हतियारसहित पाँच जनाको सङ्ख्यामा आएका नकाबधारी समूहले बैजु साहको घरमा लुटपाट गरे । समूहले घरका दुई जना महिला र चार जना केटाकेटीलाई कोठाभित्र थुनेर आठ/नौ तोला सुनचाँदीका गहना, नगद ५० हजार गरी करिब १० लाख रुपियाँभन्दा बढीको धनमाल लुटेको पीडितले जनाएका छन् ।

महोत्तरीमा कात्तिकयता चार वटा डकैतीका घटना भइसकेका छन् भने चोरीको घटना दर्जनौँभन्दा बढी छन् । प्रहरीले डकैतीको घटनामा संलग्न रहेको आरोपमा दुई जनालाई गोली प्रहार गरेर पव्रmाउ गर्न सफल भएको जनाएको छ ।

कात्तिक २० गते सोमबार जिल्लाको जलेश्वर नगरपालिका–८ सानो रतवाराका भुवनेश्वर चौधरीको घरमा हतियारसहितको समूहले लुटपाट गरेको थियो । मूल ढोका फुटाएर करिब छ÷सात जनाको समूहमा घरभित्र छिरेका लुटेराहरूले ४० तोला सुनका गहना, ४५ तोला चाँदीको गहना, मोबाइल र नगद एक लाख ७५ हजार रुपियाँ चोरी गरेको थियो ।

डाका समूहको कुटपिटबाट घरधनी ७५ वर्षीय भुवनेश्वर चौधरी, उनकी श्रीमती ७० वर्षीय शैलदेवी चौधरी, भुवनेश्वरका छोरा ५३ वर्षीय जयकिशोर चौधरी र जयकिशोरकी श्रीमती ५० वर्षीय खिमा चौधरी घाइते भएका थिए ।-गोरखापत्र

कमेन्ट गर्नुहोस्
सम्बन्धित

काठमाडौं । ईयूको सहयोगमा क्रिएसन नेपालले ‘ग्रीनसिफ्ट एम्बेस्डर’ छनौटका लागि फारम आव्हान गरेको छ । ग्रीनसिफ्ट परियोजना अन्तर्गत वातावरण संरक्षण प्रति युवाहरुलाई सचेतना जगाउनका लागि ‘ग्रीनसिफ्ट एम्बेस्डर’ छनौटका लागि फारम आव्हान गरिएको हो । ईयूको सहयोगमा सञ्चालित ग्रीनसिफ्ट नेपाल परियोजनाको लक्ष्य र उद्देश्यहरू हासिल गर्न वृहत युवा संलग्नतालाई प्रवद्र्धन गर्नका लागि ‘ग्रीनसिफ्ट एम्बेस्डर’ एक महत्वपूर्ण […]

चितवन । चितवनमा एक वर्षको अवधिमा सवारी दुर्घटनामा परी एक सय १५ जनाको मृत्यु भएको छ । विसं २०८० साउनदेखि २०८१ असारसम्म उक्त मानवीय क्षति भएको हो । जिल्लाका भित्री सडकमा भन्दा राजमार्गमा भएका दुर्घटनामा परी बढी मानवीय क्षति भएको हो । दुर्घटनामा परी मृत्यु हुनेमा ९२ पुरुष, १९ महिला र चार बालक रहेका छन् […]

काठमाडौँ । काठमाडौँको उत्तरी भेगस्थित शेषनारायण मन्दिरमा आज बिहानैदेखि दर्शनार्थीको घुइँचो लागेको छ । दक्षिणकाली नगरपालिकाको फर्पिङमा पर्ने उक्त मन्दिरमा प्रत्येक वर्ष असार शुक्ल एकादशीका दिन मेला लाग्छ । यहाँ आउने भक्तजनलाई व्यवस्थित गर्न स्थानीय जनप्रतिनिधि र सुरक्षाकर्मी खटिएका छ्न् । काठमाडौँ उपत्यकाका चार नारायणमध्ये शेषनारायण मन्दिरलाई एक महत्त्वपूर्ण तीर्थस्थलका रूपमा लिइन्छ । असार शुक्ल […]