सिरहा । मिर्चैया नगरपालिकाले निजी विद्यालयलाई जनमुखी बनाउन तीन महत्त्वपूर्ण निर्णय गरेको छ । नगरपालिकाले निजी विद्यालयको वर्गीकरण गर्ने, पाठ्यपुस्तकमा एकरुपता ल्याउने र हरेक निजी विद्यालयमा दश प्रतिशत विद्यार्थीको छात्रवृत्तिको सुनिश्चितता गर्ने महत्त्वपूर्ण निर्णय गरेको हो ।
नगरपालिकामा सोमबार बसेको नगरप्रमुख श्रवणकुमार यादव, शिक्षा शाखाका प्रतिनिधि, शिक्षा विज्ञ र निजी विद्यालयका सञ्चालकहरुको बैठकबाट यस्तो निर्णय भएको नगरपालिकाले जनाएकोे छ । विद्यालयको वर्गीकरणका लागि गठित समितिले माघ मसान्तभित्रै नगरपालिकामा प्रतिवेदन बुझाउने छ ।
समितिले बुझाउने प्रतिवेदनका आधारमा विद्यालयको वर्गीकरण गरिने र वर्गका हिसावले शुल्क निर्धारण गरिने नगरपालिकाले जनाएको छ । यसले निजी विद्यालयहरुले शुल्कका विषयमा गर्दै आएको मनोमानीको अन्त्य गर्नेछ ।
यस्तै, नयाँ शैक्षिकसत्रदेखि निजी विद्यालयहरुमा नेपाल सरकारको पाठ्यक्रम विकास केन्द्रले लागू गरे अनुसारकै पाठ्यक्रम र अन्य शैक्षिक सामग्रीहरु लागू गरिनेछ । यसले निजी विद्यालय र पब्लिकेशन बीचको सिन्डिकेटको अन्त्य गर्ने नगरपालिकाको विश्वास छ ।
यसैगरी, नगरपालिकाले नयाँ शैक्षिकसत्रदेखि शिक्षा ऐन २०२८ तथा शिक्षा नियमावली २०५९ र संस्थागत विद्यालय मापदण्ड निर्देशिका २०७१ मा उल्लेखित प्रावधान बमोजिम विद्यालयमा भर्ना भएका विद्यार्थीमध्ये १० प्रतिशत विद्यार्थीलाई निःशुल्क शिक्षाका लागि अनिवार्य छात्रवृत्तिको प्रबन्ध पनि गर्दैछ ।
यसले निजी विद्यालयहरुले आफ्नो फाइदाका हिसाबले सीमित विद्यार्थीलाई मात्रै छात्रवृत्ति दिने प्रवृत्तिको अन्त्य हुनेछ भने नगरभित्रका हजारौं जेहनदार विद्यार्थी निःशुल्क पढ्न पाउनेछन् ।
नगरपालिकाले गरेको यो प्रयत्न कार्यान्वयनमा आएपछि नगरभित्रको शैक्षिक बेथिति अन्त्य हुने र शैक्षिक क्रान्तिको आभाष गराउने विश्वास नगरप्रमुख यादवले व्यक्त गरे ।
