काठमाडौं । जनमत पार्टीले विदेशमा रहेका नेपालीहरुलाई आम निर्वाचनमा मतदान गर्न पाउने व्यवस्था मिलाउन माग गरेको छ ।
पार्टीका अध्यक्ष डा.सीके राउतले मंगलबार परराष्ट्रमन्त्री नारायणकाजी श्रेष्ठलाई ज्ञापन पत्र बुझाउँदै प्रवासी नेपालीहरुलाई मतदान गर्न पाउने व्यवस्थाको तयारी तत्कालै सुरु गर्न आग्रह गरेका छन् ।
‘प्रवासी नेपालीहरूले गर्दा वार्षिक झण्डै १५ खर्ब विप्रेषण आय प्राप्त हुने गरेको र कुल ग्राहस्थ उत्पादनको ठूलो हिस्सा यसले ओगट्दै नेपालको अर्थतन्त्रलाई टेवा पुर्याइराखेको छ ।
तर,प्रवासी नेपालीहरूको पैसा चल्ने तर भोट नचल्ने अवस्था अझै पनि देखिएको छ ।’ ज्ञापन पत्रमा भनिएको छ, ‘आगामी निर्वाचनमा प्रवासी नेपालीहरूले पनि मतदान गर्न सक्ने व्यवस्था मिलाउनु पर्नेमा त्यसको कुनै विश्वसनीय आधार देखिएको छैन । पासपोर्ट नवीकरण गर्न समेत ४–५ महिना कुर्नु पर्ने अहिलेको अवस्थामा प्रवासी नेपालीहरूले विदेशबाट मतदान गर्न पाउँछन् भने कुरा विश्वसनीय नरहेको र अन्तिम समयमा पुनः सरकारले प्राविधिक तैयारी नपुगेको भन्दै प्रवासी नेपालीहरूलाई मतदानको अधिकारबाट वञ्चित गरिने स्पष्ट संकेत देखिएको छ ।’
प्रवासी नेपालीहरूले विदेशबाटै मतदान गर्न पाउने व्यवस्थाको विषयमा गम्भीर भई अहिलेदेखि नै सोको तैयारी गर्न गराउन पार्टीले आग्रह गरेको छ ।
विभिन्न देशमा रहेका नेपालीहरूले राहदानी नवीकरण गर्न महिनौं सम्म कुर्नु पर्ने बाध्यता हटाउन आग्रह गरिएको छ ।
‘राहदानी नवीकरणका लागि समेत ४–५ महिना कुर्नु पर्ने, पटक–पटक दूतावास धाउनु पर्ने, ठूलो रकम खर्च हुने, कतिपय ठाउँमा त आफ्नो एक महिनाको तलब नै मजदुरहरूले खर्चिनु पर्ने, दूताबासका कर्मचारीहरूलाई पैसा खुवाउनु पर्ने जस्ता समस्याहरू देखा परेका छन् ।’ ज्ञापन पत्रमा उल्लेख गरिएको छ ।
प्रवासी भूमिमा काम गरेर देशकै अर्थतन्त्र धानिरहेका नेपाली कामदारहरूले पैसा र राजस्व तिरेर पनि समयमा सुलभ तरीकाले राहदानी नवीकरण गराउन नसक्नु र अनेकौं यातना खेप्नु निकै नै बिडम्बनापूर्ण रहेको जनमत पार्टीको ठहर छ ।
कर्मचारी थप्ने, पासपोर्ट नवीकरण केन्द्र तथा क्याम्पहरू दूरदराजहरूमा समेत नियमित राख्ने, प्रक्रियाहरू अनलाइन गर्ने सहितका उपायहरू अपनाएर पासपोर्ट नवीकरणलाई छिटोछरितो र भ्रष्टाचारमुक्त बनाउन सुझाव दिइएको छ ।
वैदेशिक रोजगारमा गएकाहरूमध्ये ठूलो भाग धेरै नपढेका, अंग्रेजी÷अरबी मात्रै होइन नेपाली समेत राम्ररी बोल्न र बुझ्न नसक्नेहरू रहेकाले मल्टिपल हटलाइनको व्यवस्था गर्नसमेत आग्रह गरिएको छ ।
विदेशमा रहेका नेपालीहरु तथ्यांक दूतावासहरुमा व्यवस्थित नरहेकोप्रति पनि सरकारको ध्यानाकषर्ण गराइएको छ ।
जनमत पार्टी सम्बद्ध प्रवासी जनमत संघ र गैर–आवासीय मधेशी संघलाई पहिचान गर्न मातहतका दूतावास तथा नियोगहरूलाई सर्कुलर जारी गर्न र सर्वपक्षीय बैठकहरुमा सहभागी गराउन आग्रह गरिएको पार्टी सचिब बीपी साहले जानकारी दिएका छन् ।
