जकपुरधाम ।नेकपा एमाले र माओवादी केन्द्र मधेश प्रदेश सरकारबाट फिर्ता हुने भएका छन् । एमालेका एक प्रदेश सांसदका अनुसार आइतबार सरकारलाई दिएको समर्थन पनि फिर्ता लिएको छ ।
मधेशमा जसपा नेपालका नेता सराेजकुमार यादव नेतृत्वकाे सरकार ढाल्न एमाले र माओवादीले समर्थन फिर्ता लिएका हुन् । मधेशमा यादव सरकार ढाल्ने र नयाँ सरकार गठन गर्नेबारे एमाले संसदीय दलका नेता सरोज यादव र माओवादी केन्द्र संसदीय दलका नेता भरतप्रसाद साहबीच केही दिनदेखि निरन्तर छलफल चलिरहेकाे छ ।
दुई दिनअघि पार्टीकाे शीर्षस्थ तहबाट सरकार छोड्न तयारी अवस्था रहन निर्देशन दिइएकाे थियाे । सोही अनुसार एमाले र माओवादीका मन्त्रीहरू राजीनामा दिने तयारी गरेर केन्द्रको थप निर्देशन पर्खिरहेका थिए।तर, केन्द्रको निर्देशनमै आइतबार राजीनामा बुझाए । नयाँ सरकार गठनका लागि जनमत र लोकतान्त्रिक पार्टीसँग समेत छलफल भएको एमालेका एक नेताले बताए ।
जनमतको पहिलो सर्त आफ्नो नेतृत्वमा प्रदेश सरकार हुनुपर्ने रहेको छ । ती नेताले भने, ‘एमाले, जनमत र माओवादी आलोपालो सरकारको नेतृत्व पाउनेगरी सहमति भएको छ । हामी पहिलो खेप जनमतलाई मुख्यमन्त्री दिन सहमत छौँ ।’
अहिले विपक्षमा रहेका लोकतान्त्रिक समाजवादी पार्टी (लोसपा)लाई केन्द्रदेखि र प्रदेश सरकारमा सहभागी गराउने विषयमा पनि छलफल भएको छ ।
लोसपाका एक सांसदले भने, ‘एमाले र माओवादीका नेताहरूले नयाँ सरकार गठनमा सहयोग मागेका छन् । हामीले पहिले समर्थन फिर्ता लिनुस् त्यसपछि कुरा गराैँला भनेका छाैँ ।’ मधेशमा एमाले, माओवादी, जनमत र लाेसपा मिल्दा सरकार गठनका लागि बहुमत पुग्ने गणित छ ।
नेकपा एमालेका एक नेताले मधेशमा एमाले र माओवादीले जनमतको नेतृत्व सरकार बनाउने तयार रहेको उनले बताए।
