जनकपुरधाम ।मधेश प्रदेशमा जनमत पार्टीको संसदीय दलका नेता महेशप्रसाद यादवले मधेश प्रदेश सरकारको नेतृत्व जनमत पार्टीले पाउनुपर्ने दाबी गरेका छन् ।
उनले भ्रष्टाचार र कुशासनमा संलग्न जनता समाजवादी पार्टी नेपालको सरकारको नेतृत्वबाट बहिर्गमन भएको अवस्थामा अब बन्ने नयाँ सरकारको स्वाभाविक नेतृत्व जनमत पार्टीले गर्न पाउनुपर्ने बताए ।
उनले भने, ‘विगतको चुनावमा जनमत पार्टीले प्राप्त गरेको जनादेशका कारण पनि सरकारको नेतृत्वमा हाम्रो दाबी छ ।’
उनले प्रदेशमा जनमत कुन गठबन्धनमा रहने विषयमा निर्णय भइनसकेको बताए । केन्द्रीय गठबन्धनको स्वरूपअनुसार मधेशमा पनि जनमतको सहकार्य सुनिश्चित हुने उनको भनाइ छ ।
जसपा नेपाल नेतृत्वको सरकारबाट नेकपा एमाले, नेकपा माओवादी बाहिरिनुअघि उनीसहिते एमाले, माओवादी र लोसपाका नेतासहितको तस्बिर आइतबार सार्वजनिक भएपछि जनमत पार्टी एमाले र माओवादीसहितको गठबन्धनमा सामेल हुने चर्चा चुलिएको छ ।
जनमत पार्टी संसदीय दलका नेता यादवले जसपा नेपालको नेतृत्वको सरकारबाट बाहिरिन तथा सरकारलाई दिएको समर्थन फिर्ता लिन आफूले एमाले र माओवादीको हौसला बुलन्द गर्न आइतबार ती पार्टीका नेतालाई भेटेको बताए । उनले भने, ‘सरकारसँगको साइनो चुँडाउन एमाले र माओवादीलाई ऊर्जा दिन तथा उत्साहित तुल्याउन मैले एमाले र माओवादीका नेतासँग आइतबार भेट गरेको हुँ । यसलाई गठबन्धनमा सम्मिलित भएको अर्थमा लिन हुँदैन ।’
आइतबार एमाले, माओवादी, जनमत र लोसपा नेताहरूको भेटमा गठबन्धन बनाउने र नयाँ सरकारको नेतृत्व कुन दलले गर्ने भन्ने विषयमा छलफल नभएको उनले बताए ।
नेता यादवले प्रदेश सरकार गठनमा जनमतको काँग्रेससँग पनि सहकार्य हुनसक्ने बताए ।
आज विहानै नेपाली कांग्रेस मधेश प्रदेश संसदीय दलका नेता कृष्णा कुमार यादवले मधेश प्रदेश सरकारको नेतृत्व गर्न जनमत पार्टीलाई अफर गरेको समाचार विभिन्न संचारमाध्यममा आएको थिए।यसको अर्थमा जनमत पार्टीको नेतृत्वमा मधेश सरकार बन्ने सम्भावना बढेको छ।
