०४ आषाढ २०८१, सोमबार
17-06-2024 , Mon
×

जनमतका महेश यादवले आज मुख्यमन्त्रीको दाबी पेस गर्ने

Logo
न्यूज मधेश प्रकाशित शुक्रबार, जेठ १८, २०८१

जनकपुरधाम ।मधेस प्रदेशमा नयाँ सरकार गठनको लागि विपक्षी दलहरुले आज (शुक्रबार) प्रदेश प्रमुख समक्ष मुख्यमन्त्रीको दाबी पेस गर्ने तयारी गरेका छन्।

बिहीबार बसेको नेकपा एमाले, नेकपा माओवादी केन्द्र र जनमत पार्टीको बैठकले मधेस सरकारको नेतृत्व जनमत पार्टीलाई दिने सहमति गरेको छ।

उक्त सहमतिअनुसार आज प्रदेश प्रमुख सुमित्रा भण्डारीसमक्ष सरकार गठनको लागि दावी पेस गर्ने तयारी विपक्षी गठबन्धनका तीन दलले गरेका हुन्।

जनमत पार्टीका अध्यक्ष डा.सीके राउतले मधेस प्रदेशमा जनमत पार्टीको नेत्तृत्वमा सरकार बन्न लागेको दाबी गर्दै आज प्रदेश प्रमुख समक्ष दाबी पेस गरिने जानकारी दिएका छन्।

सीके राउतको सचिवालयले एमाले, माओवादी केन्द्र र जनमत पार्टीका प्रदेश संसदीय दलका नेता महेश प्रसाद यादवले प्रदेश प्रमुख समक्ष आज दाबी पेस गर्ने जानकारी दिएको हो।

तर, मधेसमा एमाले, माओवादी र जनमतको सांसद संख्याले मात्रै नयाँ सरकार गठनको लागि आवश्यक बहुमत पुग्दैन। त्यसको लागि नेकपा एकीकृत समाजवादी र लोकतान्त्रिक समाजवादी पार्टीको पनि समर्थन आवश्यक पर्छ।

तीन दलबीच हिजो भएको सहमतिमा नेकपा एकीकृत समाजावादी र लोकतान्त्रिक समाजवादी पार्टीका नेताले हस्ताक्षर गरेका छैनन्। एमाले, माओवादी र जनमतबीचको सहमतिमा नेकपा एस र लोसपाको पनि समर्थन रहेको दाबी तीन दलका नेताले गर्दै आएका छन्।

जनमतको नेतृत्वमा सरकार बनाउन सहमति गरेका पाँच दलले आज प्रदेश प्रमुख समक्ष दाबी पेस गर्ने माओवादी संसदीय दलका नेता भरतप्रसाद साहले जानकारी दिए।

‘हिजो एमाले, माओवादी र जनमतका नेताले मात्रै सहमति पत्रमा हस्ताक्षर गरेका थिए। आज लोसपा र नेकपा एसका नेताले पनि त्यो सहमति पत्रमा हस्ताक्षर गर्नुहुन्छ,’ साहले शुक्रबार बिहान नेपालखबरसँग भने, ‘बहुमत सांसदको हस्ताक्षर भएपछि हामी मुख्यमन्त्रीसमक्ष आजै दाबी पेस गर्ने तयारीमा छौँ।’

उनले नेकपा एस र लोसपाले पनि जनमत पार्टीलाई मुख्यमन्त्री बनाउन सहमती जनाइसकेको दाबी गरे।

तीन दलबीच हिजो काठमाडौँमा भएको सहमति पत्रमा एमाले संसदीय दलका नेता सरोजकुमार यादव, माओवादी संसदीय दलका नेता भरतप्रसाद साह र जनमत पार्टीका संसदीय दलका नेता महेश प्रसाद यादवको मात्रै हस्ताक्ष छ।

सहमति पत्रमा नेकपा एसका संसदीय दलका नेता गोविन्द न्यौपाने र लोसपाका संसदीय दलका उपनेता उपेन्द्र महतोको पनि नाम राखिएको थियो। तर, उनीहरुले हिजो त्यो सहमति पत्रमा शुक्रबार हस्ताक्षर गरेनन्।

उनीहरुले हस्ताक्षर नगरेपछि उनीहरुको नाम छोपेर तीन दलका नेताले मात्रै हस्ताक्षर गरेको सहमति पत्र सार्वजनिक गरिएको थियो।

‘उक्त सहमति पत्रमा हस्ताक्षर गर्न बाँकी नेकपा एसका गोविन्द न्यौपाने र लोसपाका उपेन्द्र महतोले आजै हस्ताक्षर गर्नुहुन्छ,’ माओवादी संसदीय दलका नेता साहले भने, ‘जनमतलाई प्रदेश सरकारको नेतृत्व दिन उहाँहरु पनि सहमत भइसक्नु भएको छ। हस्ताक्षर गर्न मात्रै बाँकी हो।’

जनमत पार्टीबाट मुख्यमन्त्रीका सम्भावित पात्र महेशप्रसाद यादवले पनि नयाँ सरकार गठनको लागि बनेको विपक्षी गठबन्धनमा नेकपा एस र लोसपा सकारात्मक भएको दाबी गरे।

‘हामीबीचको सहमतिमा एकीकृत समाजावादी र लोसपाका नेताहरु पनि सकारात्मक हुनुहुन्छ,’ यादवले भने, ‘हिजो उहाँहरु काठमाडौँमा उपलव्ध हुनुहुन्थेन। उहाँहरु बाहिर हुनुहुन्थ्यो। त्यही भएर सहमति पत्रमा हस्ताक्षर हुन नसकेको हो।’

१०७ सदस्यीय प्रदेशसभामा नयाँ सरकार गठननको लागि ५४ जना प्रदेससभा सदस्यको समर्थन आवश्यक पर्छ।

प्रदेश सभामा नेकपा एमालेको सभामुखबाहेक २४, जनमत पार्टीका १३, माओवादी केन्द्रका ९, लोकतान्त्रिक समाजवादी पार्टीका ८ र एकीकृत समाजवादीका ७ सांसद छन्। त्यसैगरी कांग्रेसका २२, जसपाका १८ सांसद छन्।

नेकपा एमाले र माओवादी केन्द्रले मधेश सरकारबाट समर्थन फिर्ता लिएपछि उपेन्द्र यादव निकट मुख्यमन्त्री सरोजकुमार यादव विश्वासको मत लिनुपर्ने अवस्थामा छन्। उनले यही जेठ २३ गते विश्वासको मत लिने तयारी गरेका छन्।

एमाले, माओवादी, जनमतसहितको विपक्षी गठनबन्धनमा बहुमत पुगेको खण्डमा जनमत पार्टी संसदीय दलका नेता महेश प्रसाद यादव मुख्यमन्त्री बन्ने सम्भावना छ।

गएको निर्वाचनमा माओवादीले टिकट नदिएपछि यादव जनमत पार्टीबाट उम्मेदवार बनेका थिए।

उनले सप्तरी निर्वाचन क्षेत्र नम्बर २ को (ख) मा माओवादीका उमेश यादवलाई फराकिलो मतान्तरले पराजित गरेका थिए।

कमेन्ट गर्नुहोस्
सम्बन्धित

जनकपुरधाम । धनुषाको मिथिला नगरपालिका २ बेलाचापीमा रहेको सतलोक आश्रममा सन्त रामपालजी महाराजको सान्निध्यामा परमेश्वर कबीर साहेबको ६२७ औं प्रकट दिवसको भव्य तयारी भईरहेको छ । परमेश्वर कबीर साहेबको ६२७ बर्ष पहिले जेष्ठ पुर्णिमाका दिन कासी बनारस सहरको लहरतारा नामक तालमा कमलको फुलमा प्राकाट्य भएको मानिन्छ। सोही अवसरमा प्रत्येक वर्षझै यस वर्ष पनि आश्रममा प्रकट […]

जनकपुरधाम । मधेस प्रदेशका मुख्यमन्त्री सतिशकुमार सिंहले मधेस प्रदेशका आठवटै जिल्लामा कृषि विद्युतीकरणको काम अगाडि बढाउन छलफल सुरु गर्नुभएको छ । उहाँले आज नेपाल विद्युत् प्राधिकरणका मधेस प्रदेश प्रमुख मोनिन्द्र ठाकुरलगायतसँग यस विषयमा छलफल गर्नुभएको हो । किसानलाई सिँचाइको सुविधा सहज बनाउन खेतमा विद्युत् पु¥याउने लक्ष्यअनुरुप मुख्यमन्त्री सिंहले छलफल अगाडि बढाउनुभएको उहाँको निजी सचिवालयले जनाएको […]

जनकपुरधाम । मधेश सरकारले आगामी आर्थिक वर्षदेखि किसान कार्ड वितरण र किसानलाई पेन्सन दिने भएको छ । आगामी आर्थिक वर्ष २०८१/०८२ को बजेट शनिबार प्रदेशसभामा प्रस्तुत गर्दै अर्थमन्त्री भरत प्रसाद साहले किसान कार्ड र पेन्सनका लागि बजेट विनियोजन गरेको बताए । उनले कृषि विद्युतिकरण विस्तार र कृषि विल निःशुल्क गर्ने घोषणा पनि गरे । उनले […]