जनकपुरधाम । मधेश प्रदेशसभाको तेस्रो अधिवेशनको पहिलो बैठक नै प्रतिपक्षी दल जनमत पार्टीले अबरुद्ध गरेको छ ।
सप्तरीको राजविराजमा कृषि विश्वविद्यालय भवनको शिलान्यास समारोहमा मन्त्रीमाथि भएको आक्रमण घटनाको छानविन गर्न समिति बनाउनुपर्ने भन्दै जनमतका सांसदहरु प्रदेशसभा बैठक अबरुद्ध गरेका थिए ।
तेस्रो अधिवेशन आह्वान गरिएको र मन्त्रिपरिषद् पुनर्गठन गरिएको पत्र सभामुख रामचन्द्र मण्डलले पढेर सुनाएलगत्तै जनमतका सांसदहरु बैठक अबरुद्ध गरे । बैठक अबरुद्ध भएपछि सभामुख मण्डलले १० मिनेटका लागि स्थगित गरेका छन् ।
बैठकमा जनमतका सांसद संजय यादवले कृषि विश्वविद्यालय भवनको शिलान्यासको क्रममा भएको घटनाको छानविन गर्न पटक पटक माग राख्दा पनि वेवास्ता गर्दा बाध्य भएर सदन अबरुद्ध गर्नुपरेको बताएका थिए ।
गत माघ ८ गते कृषि विश्व विद्यालयको भवन शिलान्यास क्रममा तत्कालीन शिक्षा मन्त्री समेत रहेका जनमत संसदीय दलका नेता महेश प्रसाद यादवसहित केही सांसदहरु प्रहरीको बल प्रयोगमा घाइते भएका थिए । त्यस घटना पश्चात् सदन चल्ने बेला जनमतले छानबिन समितिको माग गर्दै सदन अवरुद्ध गर्दै आएको छ ।
