जनकपुरधाम । मधेश प्रदेश सरकारले आज शनिबार अगामी आर्थिक वर्ष २०८१।०८२ को बजेट प्रस्तुत गर्न लागेको छ ।
मधेश प्रदेशका अर्थमन्त्री भरत प्रसाद साहले प्रदेश सभाको बैठकमा अपरान्ह ४ बजे बजेट प्रस्तुत गर्नुहुने समय निर्धारण भएको प्रदेश सभा सचिवालयले जनाएको छ । प्रदेश सरकारले असार १ गते बजेट सार्वजनिक गर्नुपर्ने संवैधानिक व्यवस्था अनुरूप मधेश सरकारले आज बजेट ल्याउने तयारी गरेको छ ।
प्रदेश सरकारले आगामी आर्थिक वर्षका लागि करिब ३८ अर्ब रुपैयाँ बराबरको बजेट ल्याउने तयारी गरेको अर्थ मन्त्री साहले जानकारी दिनुभएको छ ।
बजेटको आकार चालु आर्थिक वर्षको बजेट भन्दा कम हुने बुझिएको छ। चालु आर्थिक वर्षमा मधेश प्रदेश सरकारले ४४ अर्ब ११ करोड ४६ लाख ३२ हजार रुपैयाँ बराबरको बजेट ल्याएको थियो ।
मधेश प्रदेश सरकारले प्रदेशबासीलाई बिगत भन्दा फरक अनुभूति हुने खालको बजेट ल्याउन लागेको मुख्यमन्त्री सतिश कुमार सिंहले बताउनुभएको छ। अगामी आर्थिक वर्षका लागि सदनमा प्रस्तुत २७ पृष्ठका दुई सय २७ बुँदे नीति तथा कार्यक्रम पूर्ण रूपमा कार्यान्वयन हुने बजेट मधेश प्रदेश सरकारले ल्याउन लागेको उहाँले बताउनुभयो।
बजेटमा बजेटमा गरिबी निवारण, रोजगरी सृजना, चुरे संरक्षण, कृषि, स्वास्थ्य, शिक्षा, खेलकुद, पूर्वाधार र पर्यटकीय क्षेत्रको विकास लगायतका सबै क्षेत्रलाई प्राथिमकतामा राखिएको मुख्यमन्त्री सिंहले बताउनुभयो ।
टुक्रे योजनालाई अबको बजेटमा समावेश नगरिएको उहाँको भनाई छ ।
