मनोज बनैता, सिरहा । प्रदेश २ का भूमी व्यवस्था कृषि तथा सहकारी मन्त्री शैलेन्द्र प्रसाद साहले मधेसका किसानलाई दशैको शुभकामना व्यक्त गरेका छन । साथै उनले छिटै प्रदेश २ लाई विज्ञान र प्रविधीसँग जोडेर कृषि क्षेत्रमा आमूल परिवर्तन ल्याउने प्रतिवद्धता व्यक्त गरेका छन् ।
प्रदेश २ को समृद्धिको मूल आधार कृषि नै भएको बताउँदै उनले भने ‘हालसम्म परम्परागत खेती हुँदैआएको छ, विज्ञान र प्रविधीसँग जोडेर कृषि क्षेत्रलाई बढी भन्दा बढी उत्पादनशील बनाउनु जरुरी छ ।’
खासगरी धान खेतीमा मजदुर, बीउबिजन, मलखाद लगायत सम्पूर्ण खर्चहरु जोड्दा लागत नै बढी हुने गरेकोले निरास भई कृषिबाट पलायन हुने क्रम बढेको मन्त्री साहले बताए । कृषि क्षेत्रलाई हालसम्म सरकारले उपेक्षा गर्दैआएको बताउँदै उनले भने ‘विगतमा जे जस्तो उपेक्षा भयो तर अब कृषि क्षेत्र प्रदेश सरकारको प्राथमिकतामा छ ।’
मन्त्री साहले भने कि नदीनालाहरुलाई थुनेर सिंचाई सुविधाको प्रबन्ध मिलाउने, डिप बोरिङ्ग तथा साना किसानहरुका लागि व्यापक संख्यामा ट्युवेल वितरण गरिरहेका छौ । ‘कृषिमा सम्भावना देखेर युवाहरु विदेश पलायन बाट रोकिनेछ र साथै कृषि मजदूर पाउन पनि सजिलो हुनेछ जसको लागि कृषिलाई व्यवसायीकरण गर्दै कम लागतमा प्रविधीहरुको प्रयोग र बढीभन्दा बढी उत्पादनशील बनाउनुपर्दछ ।’
