जनकपुरधाम । मधेश प्रदेशका मुख्यमन्त्री सतिशकुमार सिंहले बाघ मित्र मधेश अभियानको उद्घोष गरेका छन् ।
विश्व बाघ दिवशको अवसरमा पर्सा राष्ट्रिय निकुञ्ज कार्यालय आधाभारमा सोमबार आयोजित मानव बाघ सहअस्तित्व र समृद्धि विषयक अन्तर्क्रिया कार्यक्रमलाई सम्बोधन गर्दै उनले यस्तो उद्घोष गरेका हुन् ।
मुख्यमन्त्री सिंहले मधेश प्रदेश सरकारको नीति तथा कार्यक्रममा पर्सा राष्ट्रिय निकुन्ज र कोशी टप्पु वन्यजन्तु आरक्षलाई लक्षित गरी काम सुरु गर्ने उल्लेख रहेको बताए ।उनले आफ्नो कार्यकाल जति अवधिको भएपनि पर्यटन क्षेत्रको विकासका लागि सक्दो कार्य गर्ने प्रतिबद्धता समेत जनाए ।
चितवन राष्ट्रिय निकुन्ज र ठोरीसँग जोडिएको पर्सा राष्ट्रिय निकुन्जमा पर्यटन विकासको प्रचुर सम्भावना आफूले देखेको बताउँदै सिंहले यो निकुन्जमा सक्दो बढी पर्यटक भित्र्याउन सरोकारवालाले पनि आफ्नोस्तरबाट प्रयास गर्नुपर्ने बताए ।
पर्सा निकुन्जको प्रवर्द्धनका लागि मधेश प्रदेश सरकारले फास्ट ट्रयाकमा काम गर्ने र यसका लागि आवश्यक ऐन कानुनहरू पनि बनाउने उनले प्रतिबद्धता जनाए ।
निकट भविष्यमै मधेश प्रदेश सरकारले लगानी सम्मेलन गर्न लागेको र उक्त सम्मेलनमा आन्तरिक तथा बाह्य लगानीकर्तालाई निम्त्याएर पर्सा राष्ट्रिय निकुन्जमा पर्यटन क्षेत्रमा लगानी गर्न आफूले उत्प्रेरित गर्ने पनि उनले प्रतिबद्धता जनाए ।
मुख्यमन्त्री सिंहले अभियान सञ्चालन गर्न परियोजना प्रस्ताव गरी पेस गर्न निकुन्जका वरिष्ठ संरक्षण अधिकृत रामचन्द्र खतिवडाको संयोजकत्वमा डिभिजन वन कार्यालय पर्सा र बाराका प्रमुखहरूसमेत रहेको ३ सदस्यीय कार्यदल गठन गरिएको बताए ।
