सिरहा,१९ साउन । सिरहाको औरही गाउँपालिकाका अध्यक्ष शिवजी यादवकै उक्साहटमा कर्मचारीहरु प्रमुख प्रशासकीय अधिकृत सर्वजित झाविरुद्ध आन्दोलन थालेका छन् ।
गाउँपालिकाका कर्मचारीहरुले आज पालिका अगाडी प्रदर्शन गरेका हुन् । उनीहरु अध्यक्ष यादवलाई ज्ञापन-पत्र बुझाउँदै अधिकृत झाको सरुवा गर्न माग गरेका छन् ।
अधिकृत झाले मनपरी ढंगले कर्मचारीलाई चलाएको, सुत्केरी विदा लिएका कर्मचारीको हाजिरी काटेको र कर्मचारीको दुर्व्यवहार गर्ने गरेको भन्दै कर्मचारीहरुले उनको सरुवाको माग गरेका छन् ।
स्रोतका अनुसार गत आर्थिक वर्षको विकास निर्माणको भुक्तानी गर्न उठेको कमिशन बाँडफाँडमा अधिकृत झा र गाउँपालिका अध्यक्ष यादवबीच विवाद भएको थियो ।
विवादकै कारण अधिकृत झा पालिका अध्यक्ष यादवलाई अहिले टेर्ने गरेका छैनन् । सोही कारण अधिकृत झालाई हटाउन सहज होस् भनेर अधिकृत झाविरुद्ध कर्मचारीबाट आन्दोलन गर्न लगाएका छन् ।
आर्थिक मसान्तको अन्तिम देखि नै पालिका अध्यक्ष , प्रशासकीय अधिकृत बीच खटपट भए पनि चलाकी पुर्ण तरिकाले अधिकृत झालाई फकाएर सबै कागजातमा हस्ताक्षर गराएर अन्त्यमा उनी विरुद्ध नै आन्दोलन गराएका हुन्।
गाउँपालिका अध्यक्ष यादवले काठमाडौंमा लामो समय बसेर अधिकृत झालाई ल्याएका थिए । अहिले उही अधिकृत झा घाँडो बनेपछि पालिका अध्यक्ष यादव तनावमा छन् । स्रोतका अनुसार भोली बस्ने कार्यपालिका बैठकले नयाँ अधिकृत ल्याउने पहल गर्ने निर्णय गर्ने बुझिएको छ ।
