जनकपुरधाम,२२ साउन । मधेशका मुख्यमन्त्री सतिशकुमार सिंहले सेवाग्राहीको काममा ढिलासुस्ती नगरी आजको काम आजै गर्न कर्मचारीहरुलाई निर्देशन दिएका छन् ।
कर्मचारीहरुले कामकाजमा हेलचेक्रयाइँ गरिरहेको जनगुनासो बढेको भन्दै मुख्यमन्त्री सिंहले कर्मचारीहरुलाई आफ्नो जिम्मेवारी इमानदारीपूर्वक निर्वाह गर्न निर्देशन दिएका हुन् ।
मधेश प्रदेश सरकारको पेफा मूल्यांकनसम्बन्धी प्रारम्भिक कार्यशालामा उनले कर्मचारीहरुले कार्य सम्पादनमा ध्यान दिन जरुरी रहेको बताए ।
उनले भने, ‘मधेशको आउटपुट काठमाडौंले हेरिरहेको छ । सरकारले नीति ल्याउने हो । काम भने कर्मचारीले नै गर्ने हो ।’
सरकारलाई सफल बनाउने जिम्मा कर्मचारीमा निर्भर रहेको भन्दै मुख्यमन्त्री सिंहले यसतर्फ दत्तचित भई अघि बढ्न सचिवहरुलाई समेत निर्देशन दिए ।
‘मधेश प्रदेशमा रहेका १२ वटै मन्त्रालयको वेबसाइट अपडेट छैन । कर्मचारीहरुको सम्पर्क नम्बर लुकाइएको छ’, उनले भने, ‘मन्त्रालयका सचिव र सूचना अधिकारीले यसतर्फ गम्भीर भएर अघि बढनुपर्छ । आफ्नो दायित्व पूरा गर्नुस् ।’
