काठमाडौं ,१ भाद्र। नेपाली कांग्रेस मधेशका उपसभापतिद्वय चन्द्रशेखर यादव र वीरेन्द्रप्रसाद सिँहबीच पार्टीलाई विधि, विधान र प्रक्रियाबद्ध तरिकाले अघि बढाउने सहमति भएको छ ।
दुई उपसभापतिहरूबीच शनिबार काठमाडौँमा भएको भेटमा पार्टीको मधेश नेतृत्वमा केही समययता उत्पन्न अस्थिरता, विचलन र फिसलनविरुद्ध एक्यबद्ध भएर अघि बढ्नुपर्नेमा सहमति भएको हो ।
पार्टीका प्रदेश सभापति कृष्णा यादवले केही दिनअघि प्रदेशका तत्कालीन अर्थ मन्त्री संजय यादवले गरेका भ्रष्टाचार तथा अनियमितताका बारेमा प्रदेशसभा सदस्य उपेन्द्र महतो नेतृत्वको संसदीय समितिको छानबिन प्रतिवेदन पारित नगर्न पार्टीका प्रदेशसभा सदस्यहरूलाई दिएको निर्देशन पार्टीको नीति विपरीत रहेको ठहर समेत दुई उपसभापतिले गरेका छन् ।
उपसभापति यादवले भेटघाटको तस्बिर सामाजिक सञ्जालमा राख्दै मधेश प्रदेशसभामा उपनेता रहेका उपसभापति सिंहको प्रदेशसभामा पेस भएको भ्रष्टाचारसम्बन्धी प्रतिवेदनमा लिएको अडानको सराहना गरेका छन् । उपनेता सिंहले महतो नेतृत्वको संसदीय समितिको प्रतिवेदन प्रदेशसभामा पारित गर्न पार्टीका प्रदेश सांसदलाई निर्देशन दिएका थिए ।
उपसभापति यादवले भेटमा दुई सभापतिबीच मधेश प्रदेश सरकार, पार्टी संगठन र प्रशिक्षण र प्रदेशका पछिल्लो राजनीतिक घटाक्रमका बारेमा छलफल भएको जनाएका छन् ।
उपसभापति सिहले पनि सामाजिक सञ्जालमा लेख्दै प्रदेश सरकार, पार्टी संगठन र समसामयिक राजनीतिक घटनाक्रमका बारेमा दुई उपसभापतिबीच विस्तृत छलफल र पार्टी सुदृढीकरण तथा संगठन विस्तार गर्ने कार्यमा दृढताका साथ एकढिक्का भएर लाग्ने निष्कर्ष निकालिएको उल्लेख गरेका छन् ।
