जनकपुरधाम । धनुषाको शहिदनगर नगरपालिकामा मोटरसाइकल चोरले आतंक मच्चाएको छ । मोटरसाइकल चोरीमा संलग्नहरुले फोन मार्फत पीडितलाई अनेक खालका धम्की दिन थालेका छ।
शहिदनगर नगरपालिका ८ बिसरभोरामा चार दिन अगाडी रातिको समयमा जैलुन राइनको घरबाट स ६ प २७७५ नम्बरको पल्सर मोटरसाइकल चोरी भयो । उक्त मोटरसाइकल सकिना खातुनको नाममा रहेको छ । मोटरसाइकल चोरीमा संलग्न सोनु गोइत पक्राउ पनि परेका छन् । उनलाई अहिले प्रहरी कार्यालय यदुकोहामा राखिएको छ । तर मोटरसाइकल भने फेला परेका छैन । सोनु पक्राउ परेपछि उनकै समूहका सुरेश विराजीले फोन मार्फत पीडितलाई धम्की दिन थालेका छन् ।
मोटरसाइकल धनी मो. सफिजुललाई फोन गरेर सानुमाथि दिएको उजुरी फिर्ता लिऊ नत्र देखाइदिन्छु भन्दै धम्की दिएका छन् । करिब ५ मिनेटसम्म उनलाई प्रहरीबाट सोनुलाई नछुटाए जे पनि गर्छु भन्ने सम्मको धम्की दिएका हुन् । फोनमा उनले भनेका छन्– मेयर उदय बरबरियाले मलाई फोन गरेर धेरै गाली गर्यो । तिमी सोनुलाई हिरासतबाट बाहिर निकाल । त्यसपछि म मोटरसाइकल दिन्छु ।’
फोनमा धम्की दिने विराजी जनकपुरमा बस्दै आएको स्रोतको दावी छ । तर उनलाई प्रहरीले समात्न सकेका छैन् । उनी पक्राउ नपर्दा पीडित असुरक्षित बनेका छन् । विराजी र पक्राउ परिसकेका सोनु सहितका केहि व्यक्ति शहिदनगर नगरपालिकामा आतंक मच्चाएको स्थानीयको भनाई छ ।
शहिदनगर नगरपालिकाबाट केहि दिनभित्रै करिब ३ मोटरसाइकल चोरी भएको छ । सबै मोटरसाइकल चोरीमा उनीहरुकै गिरोहको संलग्नता रहेको स्थानीयको दावी छ । चोरहरुसंग स्थानीय जनप्रतिनिधिको समेत मिलोमतो रहँदा उनीहरु पक्राउ नपरेको पनि स्थानीयको गुनासो छ । साभार:टुडेखोज
