न्यूजमधेश,जनकपुरधाम।प्रदेश २ को राजधानी जनकपुरधाममा विभिन्न कार्यक्रमको आयोजना गरि राष्ट्रिय कण्डम दिवस मनाएको छ।
२५ औं राष्ट्रिय कण्डम दिवसको अवसरमा शनिबार जनकपुरधामस्थित रंगभूमी मैदानबाट मोटरसाइकल र्यालीको आयोजना गरिएको थियो । रंगभूमी मैदानबाट सुरु भएको र्याली जानकी मन्दिर,जनक चोक,शिवचोक,कदम चोक,मुरली चोक हुँदै जटही नाकामा पुगेर कोणसभामा परिणत भएको थियो ।
फोटो: कपिल ठाकुर
कण्डम दिवसका अवसरमा यो वर्ष ‘सेफर इज फन’ नारा तय गरिएको थियो । यौनरोग, प्रजनन स्वास्थ्य, परिवार नियोजन लगायतका क्षेत्रमा काम गर्ने संघसंस्थाले गाउँ तथा सहरहरुमा विभिन्न चेतनामूलक कार्यक्रमको आयोजना गरी कण्डम दिवस मनाएका छन् ।
कार्यक्रममा धनुषाका निमित्त प्रमुख जिल्ला अधिकारी शरद पोखरेलले एचआईभी एड्स, यौनरोग तथा अनिच्छित गर्भ रहनबाट बच्न कण्डमको प्रयोग गर्नुपर्ने, कण्डम प्रयोग गर्दा अपनाउनुपर्ने सावधानी लगायतका विषयमा आफ्नो धारणा राखेका थिए ।
रेडक्रस सोसाइटी धनुषाका सभापती नरेश प्रसाद सिंहको सभापतित्वमा आयोजित कार्यक्रमको संयोजन जिल्ला जनस्वास्थ्य कार्यालय धनुषा,रेडक्रस सोसाइटी धनुषा,जानकी आँखा अस्पताल जनकपुरधाम,जनकपुरधाम उपमहानगरपालिका लगायतले गरेका थिए भने जटही नाका आयोजित कार्यक्रमको समन्वय नगराइन नगरपालिका वडा नम्बर–२ का वडाअध्यक्ष देवलाल यादवले गरेका थिए ।
