लहान । सिरहाको विष्णुपुर गाउँपालिका वडा.५ लक्ष्मीपुरस्थित महतो फ्युल सेन्टरमा शिलबन्दी गरी बिक्रीवितरणमा रोक लगाइएको छ।
जिल्ला प्रशासन कार्यालय सिरहाको अगुवाइमा नापतौल तथा गुणस्तर कार्यालय विराटनगरका प्रतिनिधि सम्मिलित संयुक्त अनुगमन टोलीले गरेको अनुगमनको क्रममा सो फ्युल सेन्टरले पम्पको डिस्प्ले बङ्ग्याएर प्रति ५ लिटर पेट्रोलमा १ सय मिलिलिटर र प्रति ५ लिटर डिजेलमा १ सय ४० मिलिलिटर कम गरी बिक्री गरिरहेको फेला पारेपछि शिलबन्दी गरी बिक्रीवितरणमा रोक लगाइएको जिल्ला प्रशासन कार्यालय सिरहाका सूचना अधिकारी कमल आचार्यले जानकारी दिए।
उक्त फ्युल सेन्टरको डिस्प्ले युनिट नापतौल तथा गुणस्तर कार्यालय विराटनगरको जिम्मामा रहनेगरी शिलबन्दी गरिएको सूचना अधिकारी आचार्यले बताए।
