श्यामसुन्दर यादव,राजविराज । प्रदेश २ सरकारको ‘बेटी पढाउँ – बेटी बचाउ ’ अभियान अन्तर्गत सप्तरीको बोदे बरसाईन नगरपालिका वडा नं.५ स्थित रहेको चन्द्रा नमूना माध्यमिक विद्यालयका छात्राहरुलाई शुक्रवार एक समारोहकाबीच साइकल वितरण गरेको छ।
बोदे बरसाईन नगरपालिकाका नगर प्रमुख आतेशकुमार सिंह यादवको प्रमुख आतिथ्यमा आयोजित समारोहकाबीच छात्राहरुलाई साइकल प्रदान गरिएको हो । समारोहमा बोल्दै नगर प्रमुख यादवले साइकल पाएपछि छात्राहरुको थप शिक्षातर्फ आकर्षण बढ्ने विश्वास व्यक्त गरे ।
विद्यालयमा टाढा–टाढासम्मका छात्राहरु अध्ययरत रहेको जानकारी गराउँदै नगर प्रमुख यादवले उनीहरुलाई विद्यालयसम्म आउजाउ गर्न सहज बताए । विद्यालय व्यवस्थापन समितिका अध्यक्ष पूर्वमन्त्री मृगेन्द्रकुमार सिंह यादवको अध्यक्षतामा आयोजना गरिएको समारोहमा कक्षा ८ मा अध्ययरत ५६ जना छात्राहरुलाई साइकल प्रदान गरिएको छ ।
समारोहमा नगरपालिका कार्यालयका निमित्त प्रमुख प्रशासकीय अधिकृत धनश्याम यादव, विद्यालयको दाता परिवारका अनिरुद्धकुमार सिंह यादव, वृजेन्द्रकुमार सिंह यादव, गजेन्द्रकुमार सिंह यादव र दिलिपकुमार सिंह यादव लगायतकाले प्रदेश सरकारले सुरु गरेको छात्राहरुकालागि साइकल वितरण कार्यक्रमलाई प्रशन्सा गरेका थिए ।
