काठमाडौं । राष्ट्रिय जनता पार्टी नेपाल (राजपा नेपाल) अध्यक्ष मण्डलमा रहेका ६ नेताको सिन्डिकेटका कारण लथालिंग अवस्थामा पुगेको छ । अध्यक्षमण्डलमा महन्थ ठाकुर, राजेन्द्र महतो, शरतसिंह भण्डारी, महेन्द्रराय यादव, राजकिशोर यादव र अनिलकुमार झा रहेका छन् । यी ६ जना नेताहअध्यक्ष रहेको छुट्टाछुट्टै पार्टी थियो, जुन एकीकरण गरी राजपा बन्यो ।
चक्रिय प्रणालीअनुसार प्रत्येक दुई महिनामा अध्यक्ष मण्डलको संयोजक परिवर्तन हुने सहमति पार्टी एकीकरणको बेला भएको थियो । अहिले अध्यक्ष मण्डलको संयोजक ठाकुर रहेका छन् ।
राजपा नेपालका एक पदाधिकारीका अनुसार पार्टीमा ६ नेताको सिन्डिकेट छ । पार्टी विधिवत् र लोकतान्त्रिक प्रक्रियाअनुसार अगाडि नबढ्नुको मुख्य कारण अध्यक्ष मण्डलका ६ नेताले सबै अधिकार आफूमा सीमित राख्नु नै रहेको उनले प्रस्ट पारे ।
‘पार्टी त ६ नेताको सिन्डिकेटकै आधारमा चलेको छ, उनीहरूको चाहनाविपरीत पार्टी जान सक्दैन्,’ राजपा स्रोतले भन्यो, ‘उनीहरू आफैँ महाधिवेशन मिति तोक्ने र आफैँ स्थगित गर्ने, संगठनको काम पनि चुस्तदुस्त नबनाउने, समग्रमा हेर्ने हो भने, पार्टीको अवस्था लथालिंग छ ।’ राजधानी दैनिकमा खबर छ ।
