न्यूजमधेश समाचारदाता
जनकपुरधाम, १ पुस।धनुषाको महेन्द्रनगर बमकाण्डमा मृत्यु भएको परिवारलाई २५ लाखको दरले क्षतिपूर्ति उपलब्ध गराउन नेपाल औषधि व्यवसायी संघ धनुषाले माग गरेको छ ।
संघका पदाधिकारीले मंगलबार प्रमुख जिल्ला अधिकारी प्रदीपराज कणेतलमार्फत सरकारलाई ज्ञापनपत्र बुझाउँदै यस्तो माग गरेको हो । संघले बम विस्फोटमा घाइते भएकालाई राहतस्वरूप १ लाखका दरले उपलब्ध गराउन र सम्पूर्ण उपचार खर्च व्यहोर्नसमेत माग गरिएको छ ।
यस्तै, संघले उक्त बम विस्फोट घटनाको सुक्ष्म अनुसन्धान गरी अपराधीलाई समातेर कडा सजायका लागि अदालतको कटघारामा उपस्थित गराउनसमेत माग गरेको छ । ज्ञापनपत्रमा भनिएको छ, ‘बम विस्फोटको घटना दुःखद् भएकोले औषधि व्यवसायीहरू मर्माहत भएका छौँ ।’
नेपाल सरकारले शान्ति सुरक्षा कायम गर्न नसकेको भन्दै औषधि व्यवसायी असुरक्षित महसुस गरिरहेको समेत ज्ञापनपत्रमा उल्लेख गरिएको छ । संघले सरकारको सुरक्षा निकाय निष्कृय र निकम्मा भएको ठहर गरेको छ ।
संघका अध्यक्ष सत्यनारायण साह र महासचिव तेजनारायण चौधरीको हस्ताक्षर रहेको उक्त ज्ञापनपत्रमा राखेको माग पूरा नभए आन्दोलन गर्ने चेतावनीसमेत दिएको छ ।
शुक्रवार मध्यरातमा क्षिरेश्वरनाथ नगरपालिका ५ महेन्द्रनगरमा भएको शक्तिशाली बम विस्फोटमा परी प्रहरी निरीक्षक अमिर दाहाल, घरधनी राजेश्वर साह र उनका छोरा १४ वर्षीय आनन्द साहको निधन भएको थियो । उक्त घटनामा मृतक रामेश्वरका एक छोरा, एक छोरी र एक प्रहरी जवान घाइते भई धरानमा उपचाररत छन् ।
मृतक परिवारलाई भेटेर प्रदेश २ का मुख्यमन्त्री लालबाबु राउतले भने मृतकलाई क्षतिपूर्ति दिने र घाइतेको उपचार खर्च व्यहोर्ने प्रतिबद्धता जनाएका थिए । उनले क्षतिपूर्ति कति दिने विषयमा मन्त्रिपरिषद्बाट निर्णय लिने भनेका थिए । तर, हालसम्म मन्त्रिपरिषदको बैठक बस्न सकेका छैन ।
