न्यूजमधेश समाचारदाता
विरगंज,१ पुस।अवैध रूपले पर्साको भेडाहा खोलाबाट बालुवा उत्खनन् गरी पैठारी गर्दै गरेको अवस्थामा प्रहरीले बालुवा भरिएको दुइटा ट्याक्टर र ट्याक्टर चालकलाई पक्राउ गरेको छ। पर्सा प्रहरी मातहतको प्रहरी टोलीले भेडाहा खोलाबाट अवैध रूपले उत्खनन् गरी पैठारी गर्दै गरेको अवस्थामा बालुवाले भरिएका दुइटा ट्याक्टर र चालकलाई पक्राउ गरेको हो।
पर्सा प्रहरी मातहतको प्रहरी टोली गस्ती गर्दै जाने क्रममा प्रहरीले नियन्त्रणमा लिएको पर्सा प्रहरीले जनाएको छ। जिल्लाको पर्सागढी नगरपालिका-४ भेडाहा खोलाबाट अवैध बालुवा उत्खनन् गरी ल्याउँदै गरेको अवस्थामा ना. ६ त ७९०४ र ना. ५ त ६५४३ नम्बरको ट्याक्टर र ती ट्याक्टरका चालकलाई नियन्त्रणमा लिएको जिल्ला प्रहरी कार्यालय पर्साका प्रहरी नायव उपरीक्षक वीरेन्द्र बहादुर शाहीले बताए।
पक्राउ पर्ने चालकहरूमा वीरगन्ज महानगरपालिका-३२ का २८ वर्षीय मुन्ना साह सोनार र सोही ठाउँका २५ वर्षीय हाकिम देवान रहेका छन्। पक्राउ परेका दुवै ट्याक्टरसहितको बालुवा र चालकलाई थप कार्वाहीको लागि जिल्ला समन्वय समिति पर्सामा बुझाइएको उनले बताए।
स्थानीय सरकार संचालन ऐनअनुसार स्थानीयस्तरमा अहिले पर्साका कुनै पनि खोलाबाट बालुवा उत्खनन् गर्न नपाइने नियमअनुसार प्रहरीले अवैध बालुवा, गिट्टी उत्खनन्लाई पनि निगरानीमा राख्दै आएको पर्सा प्रहरीले जनाएको छ।
