न्यूजमधेश समाचारदाता
वीरगन्ज,१० पुस।पर्सा प्रहरीले ४ लाख रुपैयाँ नगदसहित ३ जना हुण्डी कारोबारीलाई पक्राउ गरेको छ ।
जिल्ला प्रहरी कार्यालय पर्साको टोलीले चेकजाँचको क्रममा भारतबाट नेपालतर्फ आउँदै गरेका २ जनालाई ४ लाख रुपैयाँ नगदसहित पक्राउ गरेको हो ।
पक्राउ पर्नेमा भारतको मोतिहारी घर भएका ४४ वर्षीय सुशील कुमार शर्मा र सोही ठाउँकी १८ वर्षीया सरोजनी कुमारी छन् ।
प्रहरीका अनुसार उनीहरु ना २९ प ८५९५ नम्बरको मोटरसाइकलमा रक्सौलबाट वीरगन्जतर्फ आउँदै गरेका थिए ।
प्रहरीसँगको बयानका क्रममा उनीहरुले उक्त पैसा वीरगन्जको आदर्शनगरस्थित अकृति कस्मेटिक पसलका सञ्चालक राज कुमार अग्रवाललाई दिन ल्याएको बताएका छन् ।
उनीहरुको बयानका आधारमा प्रहरीले अकृति कस्मेटिक पसलका सञ्चालक अग्रवाललाई पनि नियन्त्रणमा लिएर अनुसन्धान थालेको छ ।
