मनोज बनैता
लाहान, १५ पुस । लाहान नगरपालिका वडा. १६ मा पर्ने तरेगना गाउँमा एकजना कथित दलित समाजकी नाबालिक केटी उपर जबर्जस्ती बलात्कारको प्रयास भएको खबर प्राप्त भएको छ ।
बलात्कारको प्रयास गर्ने क्रममा प्रतिकार गर्दा पीडित लगायत जम्मा ३ जना महिला घायल भएका छन । पीडित सुनिता साफी (नाम परिवर्तन) को बुवा सन्जिव साफी ले दिएको जानकारी अनुसार त्यही गाउँमा बस्ने शिव यादवको छोरा जितेन्द्र यादवले मंगलवार बेलुका करिब ७ बजे सुनिता साफी माथि बलात्कारको प्रयास गरेको हो ।
पीडित को हारगुहार सुनेर प्रतिकारमा उत्रेकी उनका तीन जना आफन्त महिला माथी समेत यादवले घरेलु हतियारको प्रयोग गरि आक्रमण गरेको पीडितका बुवा सन्जिव साफीले आरोप लगाएका छन । साफीले नगरप्रहरी कार्यालयमा जानकारी गराए पछि पिडक यादव र उनका बुवा गाउँ छोडी भागेका बताउँछन् ।
पीडित नाबालिक केटी लगायत प्रतिकार गर्दा घाइते भएका महिलाहरूको उपचार लाहन स्थित कामना नर्सिङ होममा भईरहेको छ । नर्सिङ होम प्रशासनको अनुसार पीडित लगायत प्रतिकारमा उत्रेकी तिनैजना महिलाहरूको अवस्था गम्भीर रहेको छ ।
पिडितको पारिवारिक श्रोत अनुसार यादव माथी ३ महिना पहिला पनि यस्तै क्रियाकलापको कारणले तरेगनाको समाजले दन्डित गरेको थियो । यता, ईप्रका लाहानले आफू नीर जाहेरी नपरेको बताएका छन भने पीडितका परिवारले बुधबार ईप्रकामा किटानी जाहेरी गर्ने जानकारी गराएका छन ।
