न्यूजमधेश समाचारदाता
जनकपुरधाम, १९ पुस । धनुषाको क्षिरेश्वरनाथ नगरपालिका ५ महेन्द्रनगरमा प्रहरी निरीक्षकसहित तीन जनाको ज्यान लिनेगरी भएको बम विस्फोटको छानविन प्रहरी अधिकारीबाटै प्रभावित पार्ने प्रयास भइरहेको छ ।
उक्त घटनाका योजनाकार भनिएका आदम राइनलाई प्रहरी नायब निरीक्षक सन्तोष झाले पक्राउ गर्न सफल भए । तर उनलाई पक्राउ गरेको २४ घण्टा नबित्दै रातारात काजसरुवा वीरगन्ज गरिएको छ । साथै घटनाको छानविनका लागि प्रहरी निरीक्षक उमाशंकर प्रसाद साहको नेतृत्वमा सात सदस्य समिति बनेको छ । तर प्रहरी निरीक्षक साहको पनि सरुवा भइसकेको छ ।
प्रहरी निरीक्षक साहको नियमित सरुवा भएको बताएपनि प्रहरी नायब निरीक्षक झाले घटनाको मुख्य योजनाकारलाई पक्राउ गरेकै राति अचानक वीरगन्जस्थित विपद व्यवस्थापन कार्यालयमा काजसरुवा गरियो । यसले अनुसन्धान प्रभावित पार्ने चलखेल भइरहेको देखिन्छ । घटनामा संलग्नहरुलाई समात्ने प्रहरीलाई नै सरुवा गर्दा चलखेल भइरहेको देखिएको एक प्रहरी अधिकारीले बताए ।
स्रोतका अनुसार प्रदेश २ का प्रहरी प्रमुख डिआइजी प्रद्य्मन कार्कीको आदेशमा प्रहरी नायब निरीक्षक झाको सरुवा भएको छ । झा केहिदिन अगाडी जनकपुरमा डकैती गर्न आएका तीन युवकलाई हतियारसहित रंगेहात समातेपछि सम्मानित समेत भएका थिए । तर अचानक उनकै सरुवा गरेपछि बम विस्फोट घटनाको अनुसन्धान प्रभावित हुने देखिएको प्रहरी स्रोतले जनाएको छ ।
मंसिर २७ गते बम विस्फोट भएको थियो । हालसम्म उक्त घटनामा संलग्न भन्दै चार पाँच जनालाई पक्राउ गरिसकेको छ । प्रहरीले घटनामा १३ जनाको संलग्नता रहेको बताइरहेका छन् । तर पक्राउ परेकाहरु घटनामा संलग्न छन् भनेर आधिकारिक धारणा प्रहरीले सार्वजनिक गरेका छैन ।
