न्यूजमधेश सम्बादाता
जनकपुरधाम,६माघ।जनमत पार्टीका अध्यक्ष डा. सीके राउतले डेट एक्सपाइर मधेसी नेताको पछाडी नलाग्न मधेसी जनतालाई आग्रह गरेका छन् ।
सिरहाको नवराजपुर गाउँपालिकाको सोनवर्षा चोकमा मधेस आन्दोलनको प्रथम शहिद रमेश महतोको १३ औं बलिदानी दिवसको अवसरमा जनमत पार्टीद्धारा आयोजित सभालाई सम्बोधन गर्दै अध्यक्ष डा. राउतले मधेसी नेताहरु गद्दा बनेको बताए । उनले मधेसी नेता स्वार्थमा लागेको र मन्त्री बन्ने खेलमा लागेर मधेसीको मुद्दा विर्सेको आरोप लगाए ।
डा. राउतले मधेसी नेताहरु गद्दार बनेकै कारण अमेरिका छाडेर मेचीदेखि महाकालीसम्मको भ्रमण पश्चात राजनीतिमा लागेको बताए । उनले भने, ‘म अमेरिकामा वैज्ञानिक थिए । राम्रो पैसा पनि कमाउथे । राजनीतिसँग कुनै मतलव नै थिएन । तर मधेसी जनता उत्पीडनमा परेकै कारण छाडेर राजनीतिमा लागेँ ।’
डा. राउनले मधेसी शहिदहरुको सपना जनमत पार्टीले मात्र पुरा गराउन सक्ने दावी समेत गरे । उनले जनमत पार्टी जनताको पार्टी रहेको भन्दै अधिकार प्राप्त नभएसम्म संघर्ष जारी राख्ने बताए । डा. राउतले उक्त समारोहमा शहिद महतोका बुवालाई सम्मान समेत गरेका थिए ।
