न्यूजमधेश सम्बादाता
जनकपुरधाम,१२ माघ। ११ बुँदै सम्झौता गरी डा. सीके राउतले जनमत संग्रहको मुद्दा त्यागेको सरकारले दावी गरेको थियो । तर डा. राउतले जनकपुरमा आमसभा गरी जनमत संग्रहको मुद्दा नत्यागेको स्पष्ट पारेका छन् ।
सरकारसँग गरेको सम्झौता ऐतिहासिक तथा हिरा जस्तो भएको दावी गरे । उनले सरकारसँगको सम्झौताले विजयी हासिल भएको पनि बताए । उनले भने, ‘सम्झौतामा सरकारले जनमत संग्रहलाई स्वीकार गरेको छ । यसको कसैले गलत अर्थ नलगाओस् ।
डा. राउतले कुनै पार्टीसँग लेनदेन जस्तो सम्झौता नगरेको भन्दै नेपाल सरकारसँग दुई देशबीच हुने जस्तै सम्झौता गरेको दावी गरे । उनले मधेसको समस्या जनतालाई बुझाउन खोज्दा पटक पटक दमन र मुद्दा लगाएर यातना दिने काम भएको कारण मात्र सम्झौता गरेको पनि बताए ।
मधेसका जिल्लाहरु हुम्ला जुम्ला भन्दा पनि पछाडी परेको भन्दै आजसम्म सबै दलले मधेसीलाई ठग्ने काम मात्र गरेको आरोप लगाए ।
उनले मधेसी नेताहरुलाई दलालको संज्ञा दिँदै भने, ‘जसले चुनावका बेला ओलीलाई भोट भन्यो । तर पछि उही दलले ओलीको चरणमा गएर सबै भोट सुम्पिए ।’ उनले जनतालाई ठगेर सत्तामा पुग्न लेनदेन सम्झौता गर्ने गरेकोमा आपत्ति समेत जनाए ।
डा. राउतले आफ्नो कोटबाट औषधी देखाउँदै काँग्रेस, एमाले र दलाल पार्टीका नेताहरुको म्याद गुज्रेको दावी गरे । उनले भने, ‘म्याद गुज्रेको औषधी खाएपछि रियाक्स गर्छ । रोग निको हुनुको सट्टा विरामी नै मर्छ । त्यस्तै काँग्रेस, कम्यूनिष्ट र दलाल पार्टीहरुको म्याद गुज्रेको छ ।’ म्याद गुज्रेका नेताहरुको विश्वासमा पर्दा सधैं धोका मात्र दिने उनको भनाई छ ।
उनले जनमत पार्टी जनताको पार्टी भएको बताए । उनले जनमत पार्टीले जनता राज ल्याउनुका साथै भ्रष्टाचारको अन्त्य गर्ने पनि औल्याए । मधेसी दलका नेतालाई लक्षित गर्दै उनले भने, ‘म अमेरिकामै हुँदा एउटा दलालले मधेसको माग पुरा भएपछि कसरी मन्त्री बन्न पाउँछु भनेका थिए । त्यही भएर राजनीतिमा आएको छु ।’
