०८ साउन २०८१, बुधबार
24-07-2024 , Wed
×

प्रदेश २ को राजधानी र नामका लागि आज मतदान !

Logo
प्रकाशित मंगलबार, चैत्र ०४, २०७६

न्यूजमधेश सम्बादाता
जनकपुरधाम,४ चैत्र । प्रदेश २ को राजधानी र नामका लागि आज (मंगलबार) मतदान हुने भएको छ ।

आज बिहान ८ बजे हुने बैठकमा राजधानी र नामका विषयमा मतदान हुने भएकाले अनिवार्य उपस्थितिका लागि सभामुख सरोजकुमार यादवले सांसद्हरूलाई निर्देशन दिनुभएको छ ।

यसअघि, दुई पटक मतदानको मिति सारिएको थियो । चैत १ गतेका लागि मतदानको कार्यतालिका बनाइए पनि अन्तिम समयमा मिति सारिएको थियो । त्यस्तै, फागुन २३ गते मतदान गर्ने भनिएको थियो ।

प्रदेश २ को राजधानी र नामका लागि २०७६ भदौं ५ गते दलहरूले प्रदेशसभा सचिवालयमा प्रस्तावहरू दर्ता गराएका थिए । राजधानीका विषयमा पाँच र नामका विषयमा चार प्रस्तावहरू दर्ता भएका थिए ।

यी प्रस्तावहरूमाथि सांसद्सहित सरोकारबालासँग छलफल गरी सहमति जुटाउन भदौं २९ गते सभामुख सरोजकुमार यादवको संयोजकत्वमा विशेष अध्ययन समिति गठन गरिएको थियो । पटक–पटक छलफल भए पनि दलहरूबीच सहमति जुट्न नसकेपछि मतदानबाटै राजधानी र नामका विषयमा टुंगो लगाउनुपर्ने सुझावसहितको प्रतिवेदन समितिले फागुन ३० गतेको प्रदेशसभा बैठकमा पेश गरिसकेको छ ।

समितिले बुझाएको प्रतिवेदनअनुसार राजधानीका विषयमा पेश भएका पाँच प्रस्तावमा केही सहमति भएर हाल तीन प्रस्ताव कामय रहेका छन् । त्यस्तै, नामाकरणका विषयमा आएका चार प्रस्तावमध्ये कुनैमा सहमति जुट्न नसकेको समितिले जनाएको छ ।

राजधानी जनकपुरधाम राख्ने विषयमा करिब करिब दलहरूबीच सहमति जुटेको छ । तर, नामका विषयमा सबै दल आ–आफ्नै अडानमा बसेपछि सहमति जुट्न नसकेको हो ।

सत्तारुढ समाजवादी पार्टी र राजपाले संयुक्त रूपमा ‘मधेश’, नेकपाले ‘जानकी’, नेपाली कांग्रेसले ‘मिथिला भोजपुरा’ र केही सांसद्ले ‘मध्य मधेश’ नामाकरण गर्नुपर्ने भनेर प्रस्तावहरू पेश गरेका थिए ।

मतदानबाट नामाकरण पेँचिलो

मतदानबाट प्रदेशको राजधानी टुंगो लाग्ने निश्चित भए पनि नामाकरण पेँचिलो बनेको छ । राजधानी र नाम प्रदेशसभाको दुई तिहाई मतबाट पारित गर्नुपर्ने संवैधानिक व्यवस्था छ । तर, प्रदेश २ मा कुनै पनि दलको दुई तिहाई छैन ।

एक सय ७ सदस्य रहेको प्रदेश २ प्रदेशसभाको दुई तिहाई मत ७२ हुन जान्छ । मधेश प्रदेश नाम राख्नुपर्ने अडानमा रहेका सत्तारुढ सपा (३०) र राजपा (२५) सँग कुल ५५ मत मात्र रहेको छ । त्यस्तै, नेकपासँग ३२, नेपाली कांग्रेससँग १९ र रिजवान अन्सारी नेतृत्वको नेपाल संघीय समाजवादी पार्टीसँग १ मत रहेको छ ।

गणितीय हिसाबले प्रदेश २ का ठूला तीन दल मिले मात्र मतदानबाट प्रदेश २ को नामाकरण हुन सक्छ । यसका साथै क्रस भोटिङ भएको अवस्थामा पनि नामाकरण टुंगो लाग्न सक्छ । नेकपामा जानकी र कांग्रेसमा मिथिला भोजपुरा नामलाई लिएर मतभेद रहेको अवस्थामा क्रस भोटिङसमेत हुन सक्ने सम्भावना रहेको छ ।

क्रस भोटिङ भएको अवस्थामा मतदानबाट नामाकरणको टुंगो लाग्न सक्छ ।

कमेन्ट गर्नुहोस्
सम्बन्धित

सर्लाही । पूर्वराज्यमन्त्री रामचन्द्र रायको पार्थिव शरीर दाहसंस्कारका लागि लगिँदै । मलङ्गवा नगरपालिका–४, पुर्खेयौली घर भएका ८० वर्षका रायको चन्द्रनगर गाउँपालिका–१ स्थित घरमा आइतबार राति धारिलो हतियार प्रहार गरी हत्या भएको थियो ।

वीरगञ्ज । पर्सा सशस्त्र प्रहरी बल नेपाल नं १३ गणले गत आर्थिक वर्षमा रु ३४ करोड २७ लाख ७८ हजार तीन सय ३३ मूल्य बराबरका बिलबीजक नभएका र भन्सार छली गरेका सामान बरामद गरेको छ । सशस्त्र प्रहरी बल नेपाल १३ नं गणका प्रमुख राधेश्याम धिमालले आव २०७९र८० को तुलनामा आव २०८०र८१ मा नौ करोड […]

जनकपुरधाम । मधेश प्रदेश सरकारका वन तथा वातावरण मन्त्री त्रिभुवन साहले सहिद राम मनोहर यादव पार्क निर्माण गर्नको लागि जग्गा निरिक्षण गरेका छन् । सोमबार सप्तरीको तिरहुत गाउँपालिकास्थित बरखण्डित बाबा महादेव मन्दिर नजिकै स्वराज आन्दोलनको क्रममा सहिद राम मनोहर यादवको पार्क निर्माण गर्नको लागि मधेश सरकारका वन मन्त्री त्रिभुवन साहसहितको टिम जग्गा निरिक्षण गरेका हुन् […]