न्यूजमधेश सम्बादाता
जनकपुराधाम,७ चैत्र। प्रहरीले जर्वजस्ती आफ्नो कुखुराको चल्ला नियन्त्रणमा लिएर नष्ट गरेको सर्लाहीका एक पोल्ट्री व्यवसायीले आरोप लगाएका छन् ।
सर्लाहीको लालबन्दीमा रहेको यादव सप्लायर्स पोल्टी फर्मका संचालक रामवीर यादवले यस्तो आरोप लगाएका हुन् । उनले काठमाडौँ डेलिभरी गर्नका लागि किनेको कुखुरा प्रहरीले जबरजस्ती नियन्त्रण्मा लिएर नष्ट गरेको आरोप लगाएका छन् । उनले प्रहरीले व्यावसायीलाई मार पर्नेगरी काम गरिरहेको पनि गुनासो गरे ।
उनी विगत १९ वर्षदेखि कुखुरा व्यवसाय गर्दै आएका छन् । उनले काठमाडौँको प्रतिभा मिट हाउस प्रालिमा डेलिभरी गर्नका लागि फागुन २२ गते राति साढे ९ बजे सिरहा माडरबाट अढाई लाख मूल्य बराबरको कुखुरा खरिद गरेका थिए । क्वारेन्टाइनबाट समेत बिल लिएपनि सिरहा नगरपालिका ७ स्थित ट्राफिक बिट नजिक सोही राति १० बजे गाडी सहित कुखुरा नियन्त्रणमा लिएको गुनासो पोखे ।
उनले नियन्त्रणमा लिएको कुखुरा छुटाउन फागुन २२ गते डिएसपी विनोद घिमिरेसंग कुरा गर्दा समेत कुनै पहल नगरेको दुखेसो पोखेका छन् । आफूले सबै नियम प्रकृया पूरा गरेको सुनाउँदा समेत डिएसपी घिमिरेले वास्ता नगरेको उनको भनाई छ ।
प्रहरीले आफ्नो ना ४ च ९३६४ नम्बरको गाडी भन्सारमा पठाएको र सवारी चालकलाई समेत १८ दिनदेखि प्रहरीले नियन्त्रणमा उनले गुनासो गरेका छन् ।
