न्यूजमधेश सम्बादाता
जनकपुरधाम ,१९ चैत्र ।संघीय सरकारको स्वास्थ्य तथा जनसंख्या मन्त्रालयले प्रदेश २ सरकारलाई कोरोना भाइरसबिरुद्वका पाँच किसिमको सामग्री पठाएको छ ।
मन्त्रालयले उपलब्ध गराएको सामग्री मंगलबार ट्रक मार्फत् जनकपुरधाम आइपुगेको छ ।
मन्त्रालयले प्रदेश २ लाई १० हजार थान मेडिकेटेड मास्क, ४ सय थान एन–९५ मास्क, २० हजार थान पंजा र १ हजार थान गाउन पठाएको व्यवस्थापन केन्द्रका सह निर्देशक श्रवण नायकले जानकारी दिए ।
आएका सामग्रीलाई सामाजिक विकास मन्त्रालय अन्तर्गत प्रदेश स्वास्थ्य आपूर्ती व्यवस्थापन केन्द्रमा राखिएको छ ।
नायकले पाँच किसिमको कोरोनाबिरुद्वको उपकरण केन्द्रमै राखिएको र मन्त्री परिषद्को निर्णय अनुसार प्रदेशका जिल्लाहरुमा पठाइने जानकारी दिए ।
संघीय सरकारले कोरोना जाँच गर्ने मेसिन पनि यहाँ पठाउने आफूले सुनेको बताउँदै नायकले ती मेसिनसहित अन्य उपकरण पछि आउने जानकारी पाएको बताए ।
