न्यूजमधेश सम्बादाता
काठमाण्डु,१८ बैशाख । सत्तारुढ नेपाल कम्युनिस्ट पार्टी (नेकपा)को बहुचर्चित बुधवारको सचिवालय बैठक बिना निष्कर्ष टुंगिएको छ । बैठकमा प्रधानमन्त्री केपी शर्मा ओली पक्षको बहुमत रहेपनि कुनै निष्कर्षमा पुग्न सकेन् ।
असन्तुष्ट पक्षले स्थायी कमिटी बैठक डाक्ने, ओलीलाई अध्यक्ष अथवा प्रधानमन्त्री पदबाट राजिनामा दिन बाध्य पार्ने वातावरण बनाउने अपेक्षा गरिएको थियो ।तर बैठकमा सबै विषयमा समान्य छलफल भएपनि निर्णयमा पुग्न सकेन्् ।
पार्टी प्रवक्ता समेत रहेका सचिवालय सदस्य नारायणकाजी श्रेष्ठले अर्को बैठक वैशाख २० गते बोलाइएको जनाए । अगामी बैठकले स्थायी कमिटी बैठकको मागबारे निर्णय गर्ने उनले बताए ।
‘ आज हाम्रो पार्टीको सचिवालय बैठकमा पार्टी भित्रको आन्तरिक समस्या, पार्टी एकता सुदृढीकरणको महत्व, सरकार र केही कमरेडहरुले माग गर्नु भएको स्थायी कमिटी बैठक र यससँग जेडिएका विविध पक्षबारे गम्भीर विचार विमर्श भयो’ उनले भने, यो विचार विमर्श र छलफल अझै जारी छ ।२० गते फेरी बैठक बस्ने उनले बताए ।
‘यसबीचमा पार्टीको नेतृत्व टिमले अनौपचारिक गृहकार्य अगाडि बढाउँदै २० गते पुनः सचिवालयको बैठक बस्ने निर्णय भएको छ ’ प्रवक्ता श्रेष्ठले भने, सचिवालयको बैठकले यी सबै विषयमा अहिलेको आवश्यकतासँग मेल खाने, पार्टीलाई एकतावद्ध ढंगले अगाडि बढाउने र जनताले दिएको जनादेशअनुसार सामाजिक आर्थिक रुपान्तरणको प्रक्रियालाई पनि अगाडि बढाउने सन्दर्भमा उपयुक्त निर्णय लिनेछ ।
सचिवालयको अगामी बैठकले नै स्थायी कमिटी बैठकबारे निर्णय लिने उनले बताए ।मंगलवार नै बस्ने भनिएको सचिवालय बैठक सारिएको थियो ।
पछिल्लो समय सत्तारुढ नेकपाभित्रको आन्तरिक विवादले जटिल मोड लिएको छ । समाजवादी पार्टी फुटाउन अध्यादेश जारी तथा फिर्ता प्रकरणपछि पार्टीभित्र विवाद र गुटबन्दी चर्केको हो। संकटमा सघाउनुपर्ने बेला सरकारलाई अप्ठ्यारो पार्ने र यसले पार्टीलाई समेत कमजोर पार्ने मत पार्टीभित्र बन्न सकेको छैन् ।ओलीलाई दुवै पदबाट मुक्त गर्नुपर्ने माग बढेको छ ।संसदीय दलमा पनि ओली अल्पमतमा परेको बताइनछ ।ओलीले नेताहरुलाई गलाउन सचिवालय बैठक सारेको स्रोतहरुले जनाए ।
