न्यूजमधेश सम्बादाता
बाँके,१२ जेठ । बाँकेमा एक युवक काेराेनामुक्त भएर घर फर्किएका छन्।
खजुरास्थित कोरोना विशेष आइसोलेसन अस्पतालमा उपचाररत नेपालगञ्ज उपमहानगरपालिका-८ का १८ वर्षीय युवक पूर्णरूपमा स्वस्थ भई घर फर्किएको स्वास्थ्य कार्यालय बाँकेका कोरोना फोकल पर्सन नरेश श्रेष्ठले जानकारी दिए।
उनका अनुसार खजुरास्थित कोरोना विशेष अस्पतालमा उपचारपछि स्वस्थ भएर घर फर्किनेको संख्या अब २२ पुगेको छ।
तीन दिनअघि मात्रै नेपालगञ्जका पहिलो संक्रमितसहित एकैपटक २१ जना कोरोनामुक्त भएर घर फर्किएका थिए।
खजुरास्थित सुशील कोइराला प्रखर क्यान्सर अस्पतालमा प्रदेश सरकारले स्थापना गरेको कोरोना विशेष आइसोलेसन अस्पतालमा उपचार गराइरहेका युवकमा दोस्रोपटकको परीक्षणमा नेगेटिभ रिपोर्ट आएपछि स्वास्थ्य परामर्शका साथ घर पठाइएको भेरी अस्पतालका मेडिकल सुपरिटेण्डेण्ट डा. प्रकाश थापाले जानकारी दिए।
खजुराको कोरोना विशेष अस्पतालमा रहेका नेपालगञ्ज-८, जोलाहनपूर्वाका अझै तीनजनाको समयावधि नपुगेको हुँदा दोस्रो परीक्षण नगरिएको उनकाे भनाइ छ।
