मनोज मोरबैता
जनकपुरधाम ,१५ जेठ। जनमत पार्टीका अध्यक्ष डा. सिके राउतले सरकारी अर्कमण्यताका कारण धनुषाको जटही नाकामा एक युवकलाई ज्यान गुमाउनुपरेको बताएका छन् । उनले आफ्नो नागरिकप्रति प्रदेश र स्थानीय तह चिन्तित नदेखिएको आरोप लगाएका छन् ।
प्रदेश र स्थानीय सरकारको लापर्वाहीका कारण उनको मृत्यु भएको डा. राउतको भनाई छ । ‘कोरोनाको नाममा करोडौं रकम खर्च गरिरहेको सरकारले भनिरहेका छन्, तर खाना समेत नपाएर नागरिकको मृत्यु हुनु लज्जाको बिषय हो’ उनले भनेका छन् । डा. राउतले यो निन्दनीय घटना भएको बताए ।
स्थानीय सरकारलाई आफ्नो नागरिक आएको जानकारी दिइएपनि यातायात नपठाउनु दुःखद भएको उनले बताए ।
मृत्यु भएकालाई उचित क्षतिपूर्ती उपलब्ध गराउन उनले माग गरे । ‘आगामी दिनमा यस्तो गल्ती नहोस्, त्यसका लागि सचेत हुँदै सीमा नाकामा टेन्ट लगाएर खानाको व्यवस्था र यातायातको व्यवस्था गर्नु जरुरी छ’ उनले भनेका छन् ।
भारतबाट आउने क्रममा धनुषाको शहीद नगरपालिका ९ का ३० वर्षीय बीरेन्द्र यादवको बुधबार जटही सीमामा भोककै कारण मृत्यु भएको थियो ।
