सिबेन्द्र रोहिता
जनकपुरधाम ,२० जेठ । धनुषाको कमला नगरपालिकाका क्वारेन्टिनको अवस्था बेहाल बनेको छ । भारतबाट आएका व्यक्तिलाई कष्टपूर्ण अवस्थामा क्वारेन्टिनमा राखिएको छ ।
कोरोना संक्रमण फैलिन नदिन बाहिरबाट आउनेका लागि क्वारेन्टिन निर्माण गरिएको छ । तर क्वारेन्टिनमै कोचाकोच गरेर व्यक्तिलाई राखिएको छ । व्यक्तिको संख्या बढी भएपछि विद्यालयको कोठा मात्र होइन् बरण्डामै डनलप ओछ्याएर उनीहरुलाई सुत्न भनिएको छ ।
कमला नगरपालिका ८ स्थित मावि टेढामोडको क्वारेन्टिनमा अहिले ६० जनाभन्दा बढी व्यक्तिलाई राखिएको छ । तर यहाँको सम्पूर्ण व्यवस्था अव्यवस्थित बनेको छ । यहीं क्वारेन्टिनमा भारतको क्वारेन्टिनमा रहिसकेका व्यक्तिलाई पनि राखिएको छ ।
यहाँ बसेकाले खाना पाइरहेपनि अनय कुनै सुविधा दिइएको छैन् । विद्यालयमा भएको एउटा शौचालयले दिशा, पिसाव गर्न अत्यधिक समस्या भोग्नुपरिरहेको क्वारेन्टिनमा बसेकाहरु बताउँछन् । यहाँ साबुन, सेनिटाइजर केहि पनि दिइएको छैन् ।
यही क्वारेन्टिनमा कमला नगरपालिका ५ भाहुवाहाका सन्तोष सदा भारतको क्वारेन्टिनमा बसेर आएका व्यक्ति हुन् । तर उनलार्य यहाँ पनि बलजफ्ती राखिएको छ ।
‘ठीकै छ यहाँ पनि बस्छु, तर जाँच त फटाफट गरिदिनुर्पयो पनि’ सदा भन्छन्, ‘यहाँ आएको ११ दिन भइसक्यो न जाँच गरेको छ न स्वास्थ्यकर्मी आएका छन् ।’
क्वारेन्टिन अव्यवस्थित बनेपछि पनि नगर प्रमुख गैर जिम्मेबार प्रतिकृया दिन्छन् । नगरपालिका प्रमुख रामउदगार गोइतले शुरुमा व्यवस्थित गरिएपनि संख्या एक्कासी बढ्दै गएपछि समस्या भएको बताउँछन् । दैनिक २० देखि २५ जना थपिन थालेपछि समस्या भएको उनको भनाई छ ।
