मनोज मोरबैता
जनकपुरधाम,२० जेठ । धनुषाको हंसपुर नगरपालिकास्थित एक क्वारेन्टिनमा कोरोना संक्रमित पाइएपछि खाना पकाउने व्यक्ति र स्वास्थ्यकर्मी पनि आउन छाडेका छन् ।
वडा २ स्थित बगचौरा मावि क्वारेन्टिनमा बसेकामध्ये दुई जना पुरुषमा सोमबार कोरोना संक्रमण पुष्टि भएको थियो । संक्रमण पुष्टि भएपछि क्वारेन्टिनमा खाना पकाउने व्यक्ति र स्वास्थ्यकर्मी समेत आउन छाडेका छन् ।
संक्रमितलाई हालसम्म आइसोलेसनमा समेत लगिएको छैन् ।
खाना पकाउने व्यक्ति समेत आउन छाडेपछि क्वारेन्टिनमा बसेकाहरु बिहानैदेखि भोकै बसेका छन् । नजिक घर भएका व्यक्तिका परिवारबाट खाना आएको छ भने टाढा घर भएका भोकै बसेका छन् ।
क्वारेन्टिनमै बिरामी भएका आफ्ना पतिका लागि स्थानीय सोनीदेवी खाना लिएर पुगिन् । खाना खान नपाएको जानकारी पाएपछि घरबाटै पकाएर ल्याएको उनले बताइन् । भारतको सुरतमा काम गर्दै आएका उनका श्रीमान् आउनेवित्तिकै क्वारेन्टिनमा बिरामी परेका छन् ।
क्वारेन्टाइनमा दुई सातादेखि भारतबाट आएकाहरु बसिरहेका छन् । तर मंगलबार बिहानदेखि कोहि पनि नआएको क्वारेन्टिनमा बसेका इन्दल राउतले बताए । बिहान नगरपालिकाका कार्यालय सहयोगी आएर पानीको बोतल दिएर गएपछि उनी पनि फर्केर नआएको उनले बताए ।
उनले क्वारेन्टिनमा भएको झाडू र साबुनहरु पनि लिएर गएपछि आफूहरुलाई समस्या भएको बताए ।
क्वारेन्टिनमा बस्दै आएकी रबीना खातुन भोकभोकै क्वारेन्टिनमा बस्न नसक्ने बताइन् । उनले भनिन, “या त घर जान दिनुप¥यो, या त खाना दिनुप¥यो ।”
संक्रमित पाइएपछि खाना पकाउने व्यक्ति र स्वास्थ्यकर्मी समेत आउन छाडेपछि जनप्रतिनिधीले वास्ता नगरेको स्थानीय युवक बलिराम कापरले बताए ।
खना पकाउने र स्वास्थ्यकर्मीले पर्सनल प्रोटेक्सन इक्यूपमेन्ट (पिपिई) नदिइए काममा नफर्किने बताएका छन् ।
यस सम्बन्धमा धेरै पटक फोन सम्पर्क गर्दा समेत हंसपुर नगरपालिकाका प्रमुख रामज्ञान मण्डल सम्पर्कमा आएनन् ।
धनुषाका प्रमुख जिल्ला अधिकारी कोषहरि निरौलाले संक्रमित फेला परेपछि कुनै किसिमको जानकारी त्यहाँबाट नपाइएको बताए । ‘हामीलाई जानकारी दिएपछि संक्रमितलाई आइसोलेसनमा ल्याइसकेका हुन्थ्यौं’ उनले भने, “अब भोली उनीहरुलाई ल्याउन पहल गर्छु ।”
उनले स्वास्थ्यकर्मी र खाना पकाउने मान्छे नगएको सन्दर्भमा बुझ्ने बताए ।
