न्यूजमधेश डेस्क
जनकपुराधाम ,१ असार। धनुषाको सबैलास्थित इलाका प्रहरी कार्यालयको थुनुवा कक्षभित्रै झुण्डिएको अवस्थामा मृत फेला परेका धनुषाको सबैला नगरपालिकाका शम्भु सदाको घट्ना सम्बन्धी जाहेरी सरकारी वकीलको कार्यालयले दर्ता गरेको छ ।
इलाका प्रहरी कार्यालय सबैलाका प्रमुख प्रहरी निरीक्षक चन्द्रभूषण यादव, सबैला नगरपालिका वडा नम्बर २ का अध्यक्ष पारस साह, वडा नम्बर ३ का अध्यक्ष सन्तोष साह, वडा नम्बर ४ बस्ने राजकुमार यादव, वडा नम्बर २ बस्ने कारी यादव र संजय साह तथा वडा नम्बर ३ बस्ने काली प्रसाद साहबिरुद्व जाहेरी दर्ता गरिएको छ ।
यी व्यक्तिकै संलग्नतामा आफ्नो छोराको हत्या गरिएको मृतक शम्भु सदाकी आमा सियालीदेवीले जाहेरी दर्ता गराएकी हुने ।
यसअघि पटक–पटक जिल्ला प्रहरी कार्यालयमा जाँदा पनि प्रहरीले जाहेरी दर्ता गरेको थिएन् ।
जाहेरीमा प्रहरीको निगरानीमा रहेको व्यक्तिले आत्महत्या गर्न सक्ने अवस्था हुन नसक्ने भनिएको छ । प्रहरीको निगरानीमा रहने व्यक्तिले आत्महत्या गरेको भनिएपनि ती व्यक्तिको मिलोमतो र संलग्नतामा छोरा शम्भु सदाको हत्या गरी आत्महत्या गरेको देखाउन शौचालयमा लगि निजै छोराले लगाएको कपडा खोली झुण्डयाएको जाहेरीमा भनिएको छ ।
सबारी ज्यान मुद्दामा चालकको मृत्यु भएमा पीडित पक्षलाई क्षतिपूर्ती दिनुपर्देन भन्ने उद्देश्यका साथ प्रहरी निरीक्षक समेतको मिलोमतोमा आफ्नो छोराको हत्या गरिएको जिकिर जाहेरीमा गरिएको छ ।
जाहेरी दर्ता भएपछि मृतक शम्भु सदाको पोष्टमार्टम गरिदैंछ । उनको पोष्टमार्टम प्रादेशिक अस्पताल जनकपुरधाममा गर्न लागिएको म्ुसहर समुदायका अगुवा युवा पँचु सदाले जानकारी दिए ।
