न्यूजमधेश डेस्क
जनकपुरधाम,१९ असार। प्रादेशिक अस्पतालको आइसोलेसनमा छटपटिएर ज्यान गुमाएका राजु सदा र हिरासतमै मृत फेला परेका शम्भु सदाको न्यायका लागि जनकपुरधाममा प्रदर्शनमा उत्रेकाहरुमाथि प्रहरीले बल प्रयोग गरेको छ ।
दलितहरुको उल्लेख्य सहभागिता रहेको जुलुस नाराबाजी गर्दै बजार परिक्रमा गर्ने क्रममा मुख्यमन्त्री कार्यालय अगाडि पुग्दा प्रहरीले रोक्न खोजेका थिए । जुलुस नरुकेर लगातार जान लाग्दा प्रहरीले लाठी प्रहारका साथै अश्रु ग्यास समेत प्रहार गरेको दलित युवा पचु माझीले बताए ।
प्रहरीले गरेको लाठी चार्जबाट केहि व्यक्ति घाइते भएका छन् । दुई जनाको टाउको नै फुटेको दलित समुदायका अगुवा माझीले बताए । उनका अनुसार कल्याण सदा र रामप्रित सदाको टाउको फुटेको छ ।
दलित संघर्ष समितिको अगुवाईमा निकालिएको बिरोध जुलुसमा धनुषाको बिभिन्न ठाउँबाट हजारौं दलित समुदायले सहभागिता जनाएका थिए । प्रहरीले प्रदर्शनमा सहभागी केहि व्यक्तिलाई नियन्त्रणमा समेत लिएको छ ।
धनुषाका प्रहरी प्रमुख रमेश कुमार बस्नेतले मुख्यमन्त्री कार्यालयमा ढुँगामुडा गर्न गएका कारण बल प्रयोग गर्नुपरेको बताएका छन् । उनले ढुँगामुडाबाच जोगाउन ५ राउण्ड हवाई फायर र ६ राउण्ड अश्रु ग्यास प्रहार गर्नुपरेको जानकारी दिए ।
प्रहरीले बिना कारण आफूहरुमाथि बल प्रयोग गरेको भन्दै अगुवाहरुले आन्दोलनलाई झन चर्काउने बताएका छन् । अगुवा चन्देश्वर सदाले भने, “प्रहरीले बन्दुक देखाएर हामीलाई तर्साउन खोज्यो, तर हामी तर्सिनेबाला छैनौं । आन्दोलन अझ चर्काे हुन्छ ।”
उनले न्याय माग्दा प्रहरीले अन्याय गरेकाले आन्दोलनलाई निरन्तरता दिइने बताए ।
गत असार ९ गते आइसोलेसनमै छटपिटएर धनुषाको हंसपुर नगरपालिकाका १६ बर्षीय राजु सदाको ज्यान गएको थियो ।
यस्तै, सबारी ज्यान मुद्दामा इलाका प्रहरी कार्यालय सबैलामा थुनिएका स्थानीय शम्भु सदा झुण्डिएको अवस्थामा मृत फेला परेका थिए । उनको हत्या गरिएको दलित अगुवाले बताउँदै आएका छन् । राजु र शम्भुको मृत्यु सम्बन्धमा छानबिन गरी दोषीलाई कार्वाही गर्न माग गर्दै दलित संघर्ष समितिको अगुवाईमा बिहीबार प्रदर्शन गरिएको हो ।
