न्यूजमधेश डेस्क
जनकपुरधाम,२० असार । जनकपुरधाममा एक जना बालिकाको बलात्कारपछि हत्या गरिएको छ । बुधबारदेखि हराइरहेकी जनकपुरधामकी एक बालिकाको शुक्रबार शव फेला परेको छ । उनको बलात्कारपछि हत्या गरिएको आशंका गरिएको छ ।
जनकपुरधाम उपमहानगरपालिका वडा नम्बर २१ कुर्था निवासी ११ बर्षीया बालिका कञ्चन पजियारको शव शुक्रबार मध्यान्ह फेला परेको प्रहरीले जनाएको छ ।
बुधबार भैंसी चराउन निस्किएकी बालिकाको शव घरदेखि झण्डै १ किलोमिटर दूरीमा रहेको दूधमति खोला छेउमा फेला परेको धनुषा प्रहरीले जनाएको छ । उनको बलात्कारपछि हत्या गरेको देखिएको स्थानीयले बताएका छन् ।
उनको शव अर्धनग्न अवस्थामा फेला परेको धनुषाका प्रहरी प्रबक्ता रामेश्वर कार्कीले जानकारी दिए ।
उनको बलात्कारपछि हत्या गरिएको हो, होइन भन्न सन्दर्भमा तत्कालै केहि भन्न नसकिने उनले बताए । ‘पोष्टमार्टमको रिपोर्ट आएपछि अन्य कुरा खुल्छ’ उनले भने ।
कार्कीले बालिका हराएको सूचना पाए लगत्तै बिहीबारदेखि नै प्रहरी खटिएको र शुक्रबार उनको शव फेला परेसँगै अन्य अनुसन्धानलाई तिब्र पारिएको बताए ।
बुधबार दिउँसो भैंसी चराउन गएकी बालिका सो दिन साँझसम्म नफर्किएपछि उनको खोजी तिब्र पारिएको थियो । बालिका भेटाउन नसकेपछि उनको परिवारले प्रहरीमा पनि खबर गरेका थिए । त्यसपछि प्रहरी पनि खोजीमा जुटेको थियो ।
बालिकाको बलात्कार पश्चात हत्या गरिएको पाइएपछि उनको परिवारमा रुवाबासी भएको छ । छिमेकीहरु समेत शोकमग्न भएका छन् ।
पछिल्लो चौबीस घण्टामा कोरोनाबाट चार जनाको मृत्यु
निर्वाचन आयोगले कहिले टुंग्याउला नेकपा विवाद ?