न्यूजमधेश डेस्क
जनकपुरधाम,२० असार । जनमत पार्टीले नागरिकता विधेयकको बिषयलाई लिएर गठबन्धन बनाएर एकीकृत आन्दोलन गर्न आन्दोलनरत दलहरुसँग आग्रह गरेको छ ।
यही अलग अलग छिन्न भिन्न तरिकाले संघर्ष गर्नुको सट्टा सम्पूर्ण आन्दोलनकारी शक्तिहरुको बृहत गठबन्धन बनाएर सहकार्य गर्न उनले आह्वान गरेका हुन् । यसरी अगाडि बढ्दा नै अधिकार आन्दोलनलाई निर्णायक बनाउन सकिने उनको तर्क छ ।
‘यसो गर्न सकिए मात्रै जनताको हक अधिकार सुनिश्चित गर्न सकिने भएकाले संयुक्त अधिकार आन्दोलन मोर्चामा सहभागी हुनका लागि हार्दिक अनुरोध गर्दछौं’ डा. राउतले जारी गरेको बिज्ञप्तीमा भनिएको छ, “बृहत गठबन्धनको नाम, एजेन्डा तथा आन्दोलनका कार्यक्रमहरु आपसी छलफलबाट टुँगो लगाइनेछ ।”
कोरोना महामारीको बन्दाबन्दी रहेको मौका छोपेर गैर जिम्मेबार, असंवेदनशिल र षड्यन्त्रकारी प्रबृत्ति देखाउँदै राज्य व्यवस्था तथा सुशासन समितिले पारित गरेको नागरिकता ऐन संशोधन विधेयकसहित सरकारका अन्य कतिपय निर्णय तथा गतिविधीहरु मधेशी, आदिवासी, जनजाती, दलित, मुश्लिम र अल्पसंख्यकसहित उत्पीडित वर्गका जनताहरुले दशकौदेखि पटक–पटक गरेका आन्दोलनहरु र त्यसबाट संस्थागत भएका उपलब्धीहरुप्रति प्रतिगामी तथा जनचाहना विपरित रहेको राउतले ठहर गरेका छन्
