न्यूजमधेश डेस्क
काठमाडौं ,७ श्रावण ।कोरोना महामारीका कारण चार महिनादेखि रोकिएको मादक पदार्थ सेवन (मापसे) जाँच आजदेखि पुनः सुरु हुने भएको छ ।
सार्वजनिक यातायात सञ्चालनमा आएसँगै आजबाटै मापसे चेकिङ सुरु गर्न महानगरीय ट्राफिक महाशाखाले उपत्यकाका सबै युनिटलाई निर्देशन दिएको छ । नेपालमा कोरोना भाइरसको संक्रमण सुरु भएसँगै ट्राफिक प्रहरीले जोखिम बढ्ने भन्दै मापसे चेकिङ बन्द गरेको थियो ।
लकडाउन अघिका सबै ट्राफिक गतिविधि सुरु गरिएको महाशाखाका एसएसपी भीमप्रसाद ढकालले बताए । उनका अनुसार ट्राफिक नियम भन्दा बाहिर गएर सवारी सञ्चालन गरे सबै किसिमको जरिवाना लाग्छ । उनले भने, ‘पुरानै अवस्था अनुसार नियम विपरीत जानेलाई पहिले जस्तै चिट काटेर कारबाही पनि हन्छ’
महाशाखाले सडकमा गुड्ने सार्वजनिक यातायातको अनुगमनका लागि महिला ट्राफिक प्रहरीको छड्के टोलीसमेत परिचालन गरेको छ । टोलीले सार्वजनिक सवारीमा ५० प्रतिशत बढी यात्रु राखेको पाइए तत्काल कारबाही गर्ने एसएसपी ढकालले बताए ।
सार्वजनिक यातायातमा यात्रा गर्ने यात्रु आफैंले सचेत रहन जरुरी छ । आफ्नो स्वास्थ्यप्रति हामी आफैं जिम्मेवार भएर यात्रा गर्न ढकालको भनाइ छ । प्रविधियुक्त निगरानी भ्यान, सीसीटीभी क्यामेराबाट पनि निगरानी बढाइएको ढकालले बताए । माहामारीका कारण ७ चैतबाट ट्राफिकले मापसे जाँच रोकेको थियो । त्यसवेलादेखि रोकिएका सचेतना कक्षा पनि अब सुरु हुने भएको छ ।
