न्यूजमधेश डेस्क
जनकपुरधाम , १३ श्रावण । नेपालमा केहि दिनदेखि अलि मत्थर रहेको मनसुन आज (मंगलबार) देखि सक्रिय बनेको छ । न्यून चापीय रेखा नजिक भएसँगै नेपालमा भारी वर्षाको सम्भावना बढेको मौसमविदले बताएका छन् ।
हिजो सोमबार रातिदेखि नै देशका धेरै भू–भागमा वर्षाको मात्रा बढ्दै गएको मौसम पूर्वानुमान महाशाखाका मौसमविद् राजु प्रधानाङ्गले बताएका छन् । उनका अनुसार सोमबार प्रदेश–१ का धेरै स्थानमा वर्षा भएको छ भने त्यहाँका एक–दुई ठाउँमा भारी वर्षा समेत भएको छ । यस्तै गण्डकी, सुदूरपश्चिम प्रदेशमा पनि सोमबार वर्षा भएको छ ।
मौसमविद प्रधानाङ्गले अहिले हुम्लातिर वर्षा शुरु भइसकेको जानकारी दिए । अहिले प्रदेश–१, काठमाडौं उपत्यकालगायत देशका केही स्थानमा वर्षा भइरहेको उनले जानकारी दिए । आज मंगलबार देखि वर्षाको मात्रा अझ बढ्ने मौसमविद्ले अनुमान गरेका छन् ।
मौसम पूर्वानुमान महाशाखाले मंगलबार बिहान ६ बजे जारी गरेको मौसम पूर्वानुमान बुलेटिनअनुसार आज सातै प्रदेशका विभिन्न स्थानमा भारी वर्षा हुने सम्भावना छ ।
‘दिउँसो देशभर अधिकांश स्थानमा बदली रही धेरै स्थानमा हल्कादेखि मध्यम वर्षाको सम्भावना छ,’ बुलेटिनमा भनिएको छ, ‘प्रदेश–१, प्रदेश–२, बागमती, गण्डकी र प्रदेश–५ का थोरै स्थानमा तथा कर्णाली र सुदूरपश्चिम प्रदेशका एक वा दुई स्थानमा मेघगर्जन र चट्याङसहित भारी वर्षाको सम्भावना छ ।’
यस्तै राति पनि देशभर अधिकांश बदली रही धेरै स्थानमा हल्कादेखि मध्यम वर्षाको सम्भावना छ । प्रदेश–१, प्रदेश–२, बागमती, गण्डकी, प्रदेश–५, र सुदूर पश्चिमका थोरै स्थानमा तथा कर्णाली प्रदेशका एक–दुई स्थानमा मेघगर्जन र चट्याङसहित भारी वर्षाको सम्भावना रहेको महाशाखाले जनाएको छ ।
भारी बर्षाका कारण खोलानालामा पानीको सतह बढ्ने, पहाडमा पहिरो जाने र तराईका क्षेत्रमा डुबान हुन सक्ने भएकाले बेलैमा सचेतता अपनाउन मौसमविदले आग्रह गरेका छन् । यसअघि पहिरो गएका ठाउँहरुमा पुनः पहिरो जान सक्ने भएकाले सुरक्षित स्थानमा बस्न उनीहरुले आग्रह गरेका छन् ।
बुधबार र बिहीबार वर्षा अझ बढ्ने अनुमान गरिएको छ । महाशाखाको बुलेटिनअनुसार बुधबार र बिहीबार धेरै भारी वर्षा समेत हुने सम्भावना छ ।
कस्तो रहला आउँदा दुई दिनको मौसम ?
साउन १४ गते बुधबार
दिउँसो– देशभर अधिकांश बदली रही धेरै स्थानमा हल्कादेखि मध्यम वर्षाको सम्भावना छ । प्रदेश–१, प्रदेश २, बागमती, गण्डकी, प्रदेश ५, कर्णाली र सुदूरपश्चिम प्रदेशका केही स्थानमा भारीदेखि धेरै भारी वर्षाको सम्भावना छ ।
राति – देशभर साधारणतयादेखि अधिकांश बदली रही धेरै स्थानमा हल्कादेखि मध्यम वर्षाको सम्भावना छ । गण्डकी, प्रदेश–५, कर्णाली र सुदूरपश्चिम प्रदेशका केही स्थानमा र प्रदेश–१, प्रदेश–२, बागमती प्रदेशका थोरै स्थानमा भारीदेखि धेरै भारी वर्षाको सम्भावना छ ।
साउन १५ गते बिहीबार
दिउँसो –देशभर साधारणतयादेखि अधिकांश बदली रही धेरै स्थानमा हल्कादेखि मध्यम वर्षाको सम्भावना छ । प्रदेश–१, बागमती, गण्डकी, प्रदेश–५ र सुदूरपश्चिम प्रदेशका थोरै स्थानमा भारीदेखि धेरै भारी वर्षाको सम्भावना छ ।
राति – देशभर साधारणतयादेखि अधिकांश बदली रही केही स्थानमा हल्कादेखि मध्यम वर्षाको सम्भावना छ भने गण्डकी, प्रदेश–५, र प्रदेश–१ का एक–दुई स्थानमा भारी वर्षाको सम्भावना छ ।
