कैलाश दास
जनकपुरधाम, १३ श्रावण । आइसोलेसनमा छटपटिएर ज्यान गुमाएका राजु सदा र हिरासतमै मृत फेला परेका शम्भु सदाको न्यायका लागि जनकपुरधाममा थाली तथा सिटी जुलुस प्रदर्शन गरिएको छ ।
संयुक्त दलित संघर्ष समितिका संयोजक चन्देश्वर दासको नेतृत्वमा जनकपुरको जनक चोकबाट निस्केको थाली तथा सिटी जुलुस शिव, भानु, कदम चोक हुँदै जिल्ला प्रशासन कार्यालय अगाडिमा केहि बेर धर्नामा बसेपछी मुरली चौक ,राम चौक हुदै पूर्ण जनक चौकमा आएर कोण सभामा परिनत गरेको थियो ।
जनक चोकमा आयोजित कोणसभामा दलित समुदायका अगुवाले एक महिना बितिसक्दा पनि घटनाको छानबिन नभएको, दोषीलाई बचाउन खोजेको भन्दै विरोध जनाए । एक हप्ताभित्र प्रतिवेदन बुझाउने गरी छानबिन समिति बनाए पनि अहिलेसम्म छानबिन नभएको उनीहरूको भनाइ थियो । उनीहरूले दोषीलाई बचाउन खोजेको भन्दै सरकारविरुद्ध नाराबाजीसमेत गरेका थिए ।
दोषीलाई कारबाही नहुँदासम्म आन्दोलन जारी रहने संयुक्त दलित संघर्ष समिति धनुषाका संयोजक चन्देश्वर दासले बताए ।
दलित अधिकारकर्मी पचु माझिले भने अब १५ साउनमा मृदंग बजाउने र पोस्टर टाँस्ने, प्रशासन कार्यालयअगाडि धर्ना दिने र १८ साउनमा प्रशासन कार्यालयअगाडि अनिश्चितकालीन रिले अनशन बस्नेलगायत आन्दोलनका कार्यक्रम रहेको छ ।
गत असार ७ गते आइसोलेसनमै छटपिटएर धनुषाको हंसपुर नगरपालिकाका १६ वर्षीय राजु सदाको ज्यान गएको थियो ।यस्तै गत जेठ २७ गते मध्यरातिमा शम्भु सदा ईलाका प्रहरी कार्यालय सबैलामा झुण्डिएको अवस्थामा फेला परेका थिए । दलित अगुवाहरुले भने उनको हत्या भएको जिकिरसमेत गरेको छ ।
