न्यूजमधेश डेस्क
जनकपुरधाम ,१५ भदौ। स्वराज आन्दोलनको प्रथम सहिद राममनोहर यादवको तेस्रो स्मृति दिवस मनाएको छ ।
डा. सिके राउत नेतृत्वको जनमत पार्टीले प्रहरी हिरासतमा मारिएका तत्कालिन स्वतन्त्र मधेश गठबन्धनका नेता राममनोहरको तेस्रो स्मृति दिवस सोमबार मनाएको हो ।
जनमत पार्टीका अनुसार कोरोना महामारीको समयमा सभा समारोह गर्न सम्भव नभएको कारण यसपटक धनुषासहित मधेशका सबै जिल्लाहरुमा स्थानिय पालिका स्तरमा श्रद्धाञ्जली कार्यक्रम गरिएको छ ।
२०७५ भाद्र ७ गते तात्कालिन संघीय समाजवादी फोरमका अध्यक्ष एवं उपप्रधान तथा स्वास्थ्य मन्त्री उपेन्द्र यादव प्रमुख अतिथि रहेको कार्यक्रममा कालो झण्डा देखाएको आरोपमा पक्राउ गरी राज्य विप्लवको मुद्दा लगाई हिरासतमा यातना दिएर बर्दिया प्रहरीद्वारा हत्या गरिएको आरोप संगठनले लगाएको थियो ।
उच्च रक्तचापका विरामी समेत रहेका स्व. राममनोहरले नियमित खाने औषधी समेत खान नदिएको, यातनाका बेला परिवारसंग भेट्न नदिएको जानकारी केन्द्रिय नेता अब्दूल खानले दिएका थिए ।
सिकिस्त भई बेहोस भईसकेपछि मात्र प्रहरीले उपचारका लागी स्व. राममनोहरलाई लाई स्थानिय स्वास्थ्य चौकी, जिल्ला अस्पताल र अन्तमा काठमाडौं लैजाने क्रममा अनावश्यक समय बर्बाद गरी जानिजानि भाद्र १५ गते मृत्युको मुखमा पुर्याएको आरोप छ ।
