न्यूजमधेश डेस्क
सप्तरी ,२३ भदौ।चोरी गरेको आरोपमा सप्तरी प्रहरीले चार जनालाई नियन्त्रणमा लिएको छ । राजविराज नगररपालिका–७ गुदरीलाइनमास्थित ओमप्रकाश साहको दुई तल्ले पक्की घरमा रहेको गणेश स्टोर किराना पसलमा भदौ २१ गते राति चोरी गरेको आरोपमा प्रहरीले चारजनालाई नियन्त्रणमा लिएको हो ।
उक्त किराना पसलमा भदौ २२ गते बिहान खोलेर हेर्दा १ लाख ५० हजार रुपैयाँ बराबरका रिचार्ज कार्ड र नगद गरी ४ लाख रुपैयाँ चोरी भएको सूचना आएपछि अनुसन्धानमा जुटेको प्रहरीले पसलमा जडान रहेको सीसीटिभी फुटेजका आधारमा चोरीमा संल्गनहरुको पहिचान गरी पक्राउ गरेको हो ।
मंगलबार बिहान जिल्ला प्रहरी कार्यालय सप्तरीमा आयोजित पत्रकार सम्मेलनमा जिल्ला प्रहरी प्रमुख एसपी राजेन्द्रप्रसाद धमलाले राजविराज–६ का सैनी भनिने सनिया मण्डल, उनकी बहिनी ज्योतीकुमारी मण्डल, राजविराज–४ का समिम अन्सारी र रुपनी गाउँपालिका–४ का लालमहमद राइनलाई नियन्त्रणमा लिइएको जानकारी दिए ।
प्रहरीले रिचार्ज कार्ड र नगद गरी ४ लाख ९ हजार ३ सय ४५ रुपैयाँ बरामद गरेको धमलाले जनाए ।
लकडाउन र निषेधाज्ञाका बीच सप्तरी सदरमुकाम राजविराज र ग्रामिण क्षेत्रहरुमा चोरीका घटना पछिल्लो समय बढदै गएका छन् ।
