न्यूजमधेश डेस्क
गौर ,२४ भदौ । प्रदेश २ का रौतहट जिल्लामा अधिकांश स्थानीय तह निमित्त प्रमुख प्रशासकीय अधिकृतका भरमा चलिरहेका छन्। प्रशासनभन्दा बाहिरका तथा कनिष्ठ कर्मचारी निमित्त प्रमुख प्रशासकीय अधिकृतको जिम्मेवारीमा छन्।
पालिका प्रमुखहरूले मन पराएको कर्मचारी नै कार्यालय प्रमुख बनाउने प्रवृत्ति बढेपछि यस्तो समस्या देखिएको हो। रौतहटको गरुडा नगरपालिकामा इञ्जिनियर मोहम्मद मुस्ताक आलम, बृन्दावन नगरपालिकामा इञ्जिनियर नागेन्द्र यादव, राजदेवी नगरपालिकामा इञ्जिनियर सञ्जय पाण्डे निमित्त प्रमुख प्रशासकीय अधिकृत छन्।
यसैगरी, कटहरिया नगरपालिकामा लेखा अधिकृत रामप्रकाश साह, गुजरा नगरपालिकामा स्वास्थ्यका नन्देरश्वर चौधरी, फतुवाविजयपुर नगरपालिकामा स्वास्थ्यकर्मी प्रमोदकुमार गुप्तालाई निमित्त प्रमुख प्रशासकीय अधिकृतको जिम्मा दिइएको छ।
बौद्धिमाई नगरपालिकामा स्थानीय तहका रामईश्वर राय, राजपुर नगरपालिकामा स्थानीय तहका बैजु ठाकुर, देवाहीगोनाही नगरपालिका राजदेव राम तथा दुर्गाभगवती गाउँपालिका जगतकुमार साह निमित्त प्रमुख प्रशासकीय अधिकृतको जिम्मेवारीमा छन्।
दुई गाउँपालिका र १६ नगरपालिका रहेको रौतहटमा मौलापुर, गौर, ईशनाथ र माधवनारायण नगरपालिका गरी चार पालिकामा मात्र प्रशासनतर्फका अधिकृत कार्यालय प्रमुख छन्।
जिल्लामा विभिन्न पालिकाको कार्यालय प्रमुखमा स्वास्थ्य, इञ्जिनियरिङ तथा स्थानीय तहको अन्य क्षेत्रका कर्मचारीले जिम्मेवारी पाउँदा सम्बन्धित क्षेत्रको कार्यसम्पादन कमजोर हुँदै गएको भनी आलोचना हुन थालेको छ।
यसैबीच, संघीय मामिला तथा सामान्य प्रशासन मन्त्रालयले राजपुरमा स्वास्थ्यतर्फका जनस्वास्थ्य अधिकृत रवीन्द्रकुमार झा र गरुडामा शाखा अधिकृत सिकिन्द्र साहलाई निमित्त प्रमुख प्रशासकीय अधिकृतको रूपमा पठाएको छ। मन्त्रालयले पठाएको कार्यालय प्रमुखलाई कतिपय पालिकाले हाजिरी नगराई फिर्ता पठाउने गरेका छन्।
नगरपालिकाको प्रमुख प्रशासकीय अधिकृत उपसचिव हुनुपर्नेमा रौतहटका केही नगरपालिकाको निमित्त प्रमुख प्रशासकीय अधिकृतमा नायब सुब्बाले जिम्मेवारी पाएका छन्।
