कैलाश दास
जनकपुरधाम, १३ मंसिर । जनकपुरधाम उपमहानगरपालिका वडा नं. ६ स्थित राष्ट्रिय तत्मा समाज नेपालको सभाकक्ष तथा महापुरुष भीमराव अम्बेडकरको पुस्तकालय भवनको एक कार्यक्रमबीच शुक्रवार उद्घाटन भएको छ ।
जनकपुरधाम उपमहानगरपालिका मेयर लालकिशोर साहले सो भवनको उद्घाटन गरेका हुन । नेपालमै भीमराव अम्बेडकरको यो पहिलो पुस्तकालय रहेको उद्घाटन कार्यक्रममा सहभागीहरुले दावी गरेका छन् ।
पुस्तकालय भवन उद्घाटन गर्दै मेयर साहले भावुक हुँदै भने, ‘आज महापुरुष भीमराव अम्बेडकरको पुस्तकालय भवनको उद्घाटन गर्दा निक्कै हर्षित भएको छु । उहाँ महान मात्र होइन, ब्रह्माण्ड हुुनुहुन्छ । उहाँ भारतमा जन्मेपनि उहाँको विचार संसारकै लागि प्रेरणाको स्रोत हो । सामाजको परिवर्तनका लागि उहाँलाई स्मरण गर्नै पर्दछ ।’
‘पुस्तकालय भवनको उद्घाटन गर्न आउँदा धेरै टिप्पणी पनि साथीहरुसँग सुने, अम्बेडकर नेपालमा जन्मेको होइन, उनी भारतीय हुन । तर बाबा साहेब अम्बेडकरको विचार कहिले पनि भारतवासीको लागि भएको छैन । दलित, गरीब, विपन्न तथा सबै वर्गका लागि छ । उहाँको भारतको संविधान निर्माता हुन । भारतमा सयौं पटक संविधान संशोधन भएपनि उहाँले निर्माण गरेको संविधानको धारालाई भारत सरकारले छुन पनि सकेको छैन’ मेयर साहले भने, उहाँले दिनु भएको तीन मन्त्र, शिक्षित बनौं, संगठित होऔ र संघर्ष गरौं । हामी सबैले पालना गरे भने निश्चित नै सामाजिक परिवर्तन हुनेछ ।’
राष्ट्रिय तत्मा समाज नेपालको केन्द्रिय अध्यक्ष रामअशिष दासको अध्यक्षतामा भएको उद्घाटन कार्यक्रममा मेयर साहले हामी सबैको अम्बेडकर जस्तै ब्रह्म छ, तर त्यसलाई बाहिर ल्याउन सकेको छैन । यो पुस्तकालय पश्चात् सबैमा जनचेतना आउने छ मलाई पूर्ण विश्वास रहेको बताएका छन् ।
उनले भने, ‘अम्बेडर पुस्तकालयको भवन उद्घाटनलाई लिएर केही टिप्पणी हुन सक्छ, तर म गौरवान्वित छौ । पुस्तकालयमा उपमहानगरपालिकाद्वारा उहाँको स्टेचु निर्माण गर्नेछौं । पुस्तक समेत उपलब्ध गराउने छांै ।’
अम्बेडकरको केही पंक्तिलाई स्मरण गर्दै मेयर साहले पुस्तकालयका लागि यो थोरै लगानी छ, आउने दिनमा पनि उपहानगरपालिकाले सहयोग गर्नेछ विश्वास दिलाउन चाहन्छौं उनले भने ।
जनकपुरधाम उपमहानगरपालिकाको आर्थिक सहयोगमा सभाकक्ष तथा पुस्तकालय भवन निर्माण भएको छ ।
कार्यक्रममा जनकपुर अञ्चल बस व्यवसायी संघका अध्यक्ष तथा जनता समाजवादी पार्टीका केन्द्रिय सदस्य मनोज चौधरी, सोडेपका सत्यनारायण साह, मुन्नी देवी दास, दलित संघर्ष समितिका चन्देश्वर दास, वडा नं। ११ का वडा अध्यक्ष रामचन्द्र साह लगायत दर्जनौं व्यक्तिले बाबा अम्बेडकरको योगदानलाई स्मरण गरेका छन् ।
कार्यक्रममा आठवटै जिल्लाका राष्ट्रिय तत्मा समाज नेपालका अध्यक्षहरुको उपस्थिति रहेका थिए ।
