न्यूजमधेश डेस्क
मोरंग ,२४ मंसिर । प्रदेशमा निर्माण हुने संरचनामा अपाङ्गता एवं फरक क्षमता भएका सबैको पहुँच पुग्नुपर्ने सुझाव सरोकारवालाले दिएका छन् ।
प्रदेश नं १ सामाजिक विकास मन्त्रालय, प्रदेश स्वास्थ्य निर्देशनालय धनकुटा र राष्ट्रिय अपाङ्ग महासङ्घ प्रदेश समितिले संयुक्तरुपमा आज यहाँ आयोजित ‘अपाङ्गता भएका व्यक्तिको पुनःस्थापना र विद्यमान संरचना’ विषयक अन्तरक्रिया कार्यक्रममा उनीहरुले अब निर्माण हुने प्रदेश तथा स्थानीय तहका संरचनामा अपाङ्गता एवं फरक क्षमता भएका व्यक्तिको पहुँच पुग्नुपर्ने सुझाव दिएका हुन् ।
सो अवसरमा सामाजिक विकासमन्त्री जीवन घिमिरेले अपाङ्गता भएका व्यक्तिलाई सम्मान र उनीहरुको जीवनशैली सहज बनाउन सबैको सहयोग र समन्वय आवश्यक रहेको बताउनुभयो ।
उहाँले अब निर्माण हुने भौतिक संरचनालाई अपाङ्गमैत्री बनाउनेतर्फ सरकार प्रतिबद्ध रहेको बताउँदै अपाङ्गता भएका व्यक्तिको सहज पहुँचका लागि मन्त्रालयको भुइँतलामा सम्पर्क केन्द्र राखिएको जानकारी दिनुभयो ।
महासङ्घका प्रदेश समिति अध्यक्ष विमल बस्नेतले अपाङ्गमैत्री संरचना निर्माणमा सरकारले प्रभावकारी कदम चाल्नुपर्ने बताउँदै सबै क्षेत्रमा सहज प्रवेशका लागि अपाङ्गता भएका व्यक्ति, वृद्ध र बालबालिकालाई प्राथमिकता दिनुपर्ने आवश्यकता आँैल्याउनुभयो ।
‘कोभिड–१९ पश्चातको उत्कृष्ट पुनरागमन सुनिश्चितताः अपाङ्गता भएका व्यक्तिको पहुँच र दीगो विकासका लागि हामी सबैको प्रतिबद्धता’ नाराका साथ अपाङ्गता भएका व्यक्तिको २९औँ अन्तरराष्ट्रिय दिवसका अवसरमा आयोजित अन्तक्र्रियामा सामाजिक विकास राज्यमन्त्री जसमाया गजमेर, विराटनगर महानगरपालिका, बूढीगङ्गा, कटहरी र ग्रामथान गाउँपालिका र सम्बन्धीत सङ्घसंस्थालगायतका प्रतिनिधिको सहभागिता रहेको थियो ।
